Wararka24: 28-02-2026 Madaxweynaha Puntland, Saciid Cabdullaahi Deni, ayaa muujiyay niyad-jab ku saabsan suurtagalnimada wada-hadal dambe oo lala yeesho Madaxweynaha Soomaaliya, Xasan Sheekh Maxamuud, isagoo sheegay in fursadihii wada-xaajoodka ay soo dhammaadeen.
Deni ayaa hadalkan ka jeediyay shir ay xubno ka tirsan mucaaradka ku yeesheen hoteelka Jasiira ee Muqdisho.
Saciid Deni ayaa sheegay in isku dayo badan oo lagu doonayay xal siyaasadeed ay guuldarreysteen, isaga oo ku eedeeyay madaxweynaha inuu ka biyo diiday talooyin iyo waanooyin loo jeediyay. “Aniga waan garan waayay si loola hadlo, waxaase qabaa hadal dambe yaan loogu tegin way soo dhammaatay in loo caqli celiyo,” ayuu yiri Deni.
Wuxuu sidoo kale dhaliil u jeediyay qorshaha wax ka beddelka Dastuurka, isagoo sheegay in Baarlamaanka uu ku guda jiro arrin xasaasi ah xilli ay ka harsan tahay muddo kooban oo xilkiisa ah.
Deni ayaa ku dooday in isbeddelka Dastuurka uu u baahan yahay wada-tashi ballaaran, isla markaana aan lagu degdegin go’aan aan loo dhammayn.
Hadalladan ayaa kusoo beegmaya xilli ay fashilmeen wada-hadallo u dhexeeyay Villa Somalia iyo Golaha Mustaqbalka oo ku saabsanaa khilaafka doorashooyinka. Kulamadaasi ayaa lagu kala kacay iyadoo aan la gaarin is-afgarad, taas oo sii xoojisay is-mariwaaga siyaasadeed ee ka taagan dalka.
Khilaafka u dhexeeya Dowladda Federaalka iyo qaar ka mid ah maamul-goboleedyada ayaa weli taagan, iyadoo dhinacyadu ku kala aragti duwan yihiin hannaanka doorashooyinka iyo wax ka beddelka Dastuurka.
