Wararka24: 27-02-2026 Madaxweynaha Somaliland, Cabdiraxmaan Maxamed Cabdillaahi Cirro, ayaa ugu baaqay shacabka inay ilaashadaan midnimada iyo wadajirka, xilli uu sheegay in Somaliland ay wajahayo cadaadis iyo mucaarad diblomaasiyadeed oo ka dhashay aqoonsigii ay Israa’iil siisay.
Madaxweynaha ayaa sheegay in Somaliland aysan cidna dhibaato u geysan, balse ay hadda la kulmeyso waxa uu ku tilmaamay cadaawad ka imaaneysa dalal gobolka ku yaalla.
“Colaado badan ayaa Somaliland ku socda, cidna waxba umaynaan gaysan, cid aynu wax ka qaadnay ma jirto, marka waxa loo baahanyahay oo aan shacabka ugu baaqaya in uu midnimadiisa iyo wadajirkiisa ilaashado, in uu qaranimadiisa iyo dowladnimadiisa difaaco,” ayuu yiri Madaxweyne Cirro.
Wuxuu intaas ku daray in loo baahan yahay feejignaan iyo isku duubni si looga gudbo marxaladda siyaasadeed ee taagan.
Madaxweynaha ayaa si gaar ah ugu mahadceliyay culimada, isaga oo sheegay in ay bulshada ku jiheeyeen arrinta aqoonsiga, isla markaana ay ka hortageen fasiraado khaldan. “Culimada waan u mahadnaqayaa, wanan u ducaynayaa,” ayuu yiri.
Dowladda Federaalka Soomaaliya ayaa horey u sheegtay in aqoonsiga Israa’iil uu khatar ku yahay midnimada dhuleed ee Soomaaliya, iyadoo wadda dadaallo diblomaasiyadeed oo ay ku doonayso in Israa’iil dib uga fiirsato tallaabadaas.
Dalal kale oo gobolka ku yaalla ayaa sidoo kale muujiyay walaac ku saabsan saameynta aqoonsigaasi ku yeelan karo xasilloonida Geeska Afrika.
Arrintan ayaa sare u qaaday xiisadda diblomaasiyadeed ee gobolka, iyadoo dhinacyadu ay ku kala aragti duwan yihiin mustaqbalka siyaasadeed ee Somaliland iyo saamaynta aqoonsigaasi ku yeelan karo xiriirrada gobolka
