Wararka24: 21-02-2026 Hay’adda Barnaamijka Cunnada Adduunka ee Qaramada Midoobay (WFP) ayaa ka digtay in howlaha gargaarka bani’aadannimo ee ay ka wado Soomaaliya ay wajahayaan khatar hakad ah toddobaadyada soo socda, haddii aan si degdeg ah loo helin dhaqaale ku filan oo lagu sii wado kaalmada cuntada iyo nafaqada degdegga ah.
Ross Smith, Agaasimaha Diyaargarowga iyo Ka-jawaabista Gurmadka Degdegga ah ee WFP, ayaa sheegay in ku dhowaad laba milyan oo carruur ah oo ku nool Soomaaliya ay la ildaran yihiin nafaqo-darro ba’an, xilli ay sii kordhayaan saameynta abaaraha, colaadaha iyo hoos u dhaca maalgelinta bani’aadannimo.
Mas’uulkan ayaa sheegay in dalka uu wajahayo mid ka mid ah dhibaatooyinka gaajada ee ugu daran sanadihii u dambeeyay, kadib laba xilli-roobaad oo xiriir ah oo roob yari ah, colaado sii xoogeysanaya iyo hoos u dhac ku yimid taageeradii deeq-bixiyeyaasha.
WFP ayaa xaqiijisay in dhaqaale yaraanta hadda jirta ay ku qasabtay hay’adda inay si weyn u dhimto tirada dadka ka faa’iideysanaya gargaarka cuntada degdegga ah, taasoo hoos uga dhacday malaayiin qof una soo koobantay boqollaal kun oo keliya.
Hay’addu waxay sheegtay in barnaamijyada nafaqada ee haweenka uurka leh, kuwa nuujinaya iyo carruurta yaryar ay sidoo kale la kulmeen dhimista ugu weyn, taasoo sii kordhin karta halista nafaqo-darro ba’an iyo cudurro la xiriira gaajada.
WFP ayaa ka digtay in xaaladdu si xawli ah uga sii darayso, qoysas badanna ay waayeen ilihii nolol-maalmeedkooda, taasoo ku riixaysa inay u sii dhowaadaan xaalad macaluul.
Ugu dambayn, hay’addu waxay sheegtay in ay si degdeg ah ugu baahan tahay dhaqaale lagu sii wado gargaarka dadka ugu nugul inta u dhexeysa bilaha Maarso illaa Agoosto 2026, iyadoo ka digtay in haddii aan la helin maalgelintaas, ay suurtagal tahay in howlaha gargaarka ee Soomaaliya ay istaagaan bilaha soo socda.
