Wararka24: 20-02-2026 Turkiga ayaa shaaciyay in uu qorsheynayo ballaarinta barnaamijyada tababarka milatari, la-talinta iyo taageerada amniga ee uu siiyo Soomaaliya, si loo xoojiyo xasilloonida iyo sugidda amniga dalka.
Afhayeenka Wasaaradda Gaashaandhigga Turkiga, Zeki Aktürk, oo shir jaraa’id toddobaadle ah ku qabtay magaalada Ankara, ayaa sheegay in Ankara ay sii wadi doonto taageerada ay ku garab taagan tahay dowladda Soomaaliya, gaar ahaan dhinacyada tababarka ciidamada iyo la-talinta amniga.
Aktürk ayaa tilmaamay in taageerada Turkiga ay si gaar ah diiradda u saari doonto xoojinta awoodda Ciidanka Qaranka Soomaaliyeed, sugidda amniga guud iyo la-dagaallanka kooxaha argagixisada, isagoo xusay in Turkigu kaalin ka qaadanayo ilaalinta hawlaha sahminta shidaalka ee ka socda xeebaha Soomaaliya.
Afhayeenka ayaa sidoo kale sheegay in wafdi ka socda Taliska Ciidamada Badda Turkiga ay dhawaan booqdeen Soomaaliya, si ay u qiimeeyaan heerka iskaashiga milatari iyo hawlaha wadajirka ah ee labada dal, taasoo muujinaysa sii xoojinta xiriirka difaac iyo amni ee Ankara iyo Muqdisho.
Tallaabadan ayaa imaneysa xilli Turkigu uu kamid yahay saaxiibbada ugu muhiimsan ee Soomaaliya ka taageera dhinacyada amniga, tababarka ciidamada iyo horumarinta hay’adaha difaaca, iyada oo la doonayo in la xoojiyo awoodda dowladda federaalka ee la-dagaallanka kooxaha hubeysan iyo sugidda amniga dalka.
