Wararka24: 18-02-2026 Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa hambalyo ku aaddan bilashada bisha barakeysan ee Ramadan u diray shacabka Soomaaliyeed iyo guud ahaan Ummadda Muslimiinta.
Madaxweynaha ayaa ugu baaqay bulshada Soomaaliyeed in ay ka faa’iideystaan fadliga bisha Ramadan, isla markaana ay u istaagaan gurmadka dadka ay saameeyeen abaaraha ka jira qaybo kamid ah dalka.
Wuxuu carrabka ku adkeeyay muhiimadda ay leedahay isku duubnida iyo garab istaagga dadka nugul inta lagu jiro bisha barakeysan.
Sidoo kale, Madaxweynaha ayaa si gaar ah u bogaadiyay Ciidamada Qalabka Sida ee Soomaaliyeed, isagoo ku tilmaamay kuwo habeen iyo maalinba u taagan difaaca nafta iyo hantida shacabka, isla markaana door weyn ka qaadanaya sugidda amniga, xoreynta iyo xasillinta dalka.
Madaxweynaha ayaa ugu dambayn bulshada ugu baaqay in ay xoojiyaan ilaalinta danta guud, gaar ahaan amniga, isla markaana ay adkeeyaan midnimada iyo wadajirka bulshada inta lagu jiro bisha Ramadan.
