Guddoomiyaha Maxkamadda Darajada Koowaad ee Ciidamada Qalabka Sida, Sareeye Guuto Xasan Cali Nuur “Shuute”, ayaa sheegay in xatooyada qalabka iyo agabka militariga ay noqotay dambigii ugu cuslaa ee la diiwaangeliyo sanadkii 2025, marka laga reebo dambiyada la xiriira argagixisada.
Shuute ayaa sheegay in maxkamaddu ay sanadkii tegay dhageysatay dacwado badan oo ka dhan ah askar iyo shaqsiyaad lagu eedeeyay inay ku lug lahaayeen xatooyada hubka iyo qalabka ciidanka, iyadoo qaar kamid ah eedeysaneyaasha lagu riday xukuno kala duwan oo haatan ku xiran xabsiyada.
Guddoomiyaha Maxkamadda Ciidamada ayaa carrabka ku adkeeyay in, inkastoo tallaabo sharci ah laga qaado cid kasta oo lagu helo dambiga, haddana ay muhiim tahay in si qoto dheer loo baaro sababaha dhabta ah ee keena kororka xatooyada hantida ciidamada.
“Sanadkii 2025, dambiyada ugu culus ee la diiwaangeliyay marka laga reebo kuwa argagixisada la xiriira waa xatooyada qalabka militariga. Xiritaanka dadka hubka xada waa tallaabo muhiim ah, balse ma xallinayso sababta dhabta ah ee keentay falalkan,” ayuu yiri Shuute.
Wuxuu intaas ku daray in maxkamaddu ay diyaar u tahay inay dib u furto dacwado hore haddii loo baahdo baaritaanno dheeraad ah, si loo helo xaqiiqda buuxda ee ku saabsan dhacdooyinka la xiriira xatooyada hubka iyo agabka ciidanka.
Maxkamadda Ciidamada Qalabka Sida ayaa qaabilsan dacwadaha la xiriira argagixisada, dilalka, xatooyada, iyo xadgudubyada kale ee ka dhaca gudaha ciidamada, iyadoo dhammaan kiisaskaasi maraan hannaan garsoor oo rasmi ah.
