Wararka24: 13-02-2026 Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa lagu wadaa inuu u safro magaalada Addis Ababa ee caasimadda dalka Itoobiya, si uu uga qeyb galo Shirka 39-aad ee Madaxweynayaasha iyo Madaxda Dowladaha Midowga Afrika (AU).
Inta uu socdo shirka, madaxweynaha ayaa jeedin doona khudbad uu kaga hadlayo xaaladda guud ee Soomaaliya, isaga oo si gaar ah diiradda u saari doona guulaha laga gaaray dhinaca amniga iyo dagaalka ka dhanka ah Al-Shabaab.
Waxaa sidoo kale la filayaa inuu caddeeyo mowqifka dowladda Federaalka ee ka dhanka ah faragelinta shisheeye, gaar ahaan eedaymaha la xiriira aqoonsi sharci-darro ah oo Israa’iil siisay Somaliland, taas oo Muqdisho u aragto xadgudub ka dhan ah midnimada iyo madax-bannaanida dalka.
Shirka Midowga Afrika waxaa ka qeyb galaya hoggaamiyeyaasha 55-ka dal ee qaaradda Afrika, waxaana ajandaha diiradda lagu saari doonaa arrimaha amniga, dhaqaalaha iyo xasilloonida siyaasadeed ee qaaradda. Waxaa la filayaa in shirka laga soo saaro qaraarro iyo go’aanno lagu xoojinayo wadajirka Afrika ee fagaarayaasha caalamiga ah.
Inta uu ku sugan yahay Addis Ababa, Madaxweyne Xasan Sheekh Maxamuud ayaa la filayaa inuu kulamo gaar-gaar ah la yeesho qaar ka mid ah madaxda dalalka ka qeyb galaya shirka, kuwaas oo lagu xoojin doono xiriirka diblomaasiyadeed iyo iskaashiga laba geesoodka ah.
