Wararka24: 12-02-2026 Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa lagu wadaa in saacadaha soo socda u baxo safar dibadeed oo degdeg ah, isagoo kusii jeeda dalka Itoobiya.
Ilo xog-ogaal ah ayaa xaqiijiyay in madaxweynuhu ka qaybgalayo meertada 39-aad ee Shir-madaxeedka Madaxda iyo Dowladaha Midowga Afrika, oo ka dhacaya magaalada Addis Ababa. Madaxweynaha ayaa halkaas ka jeedin doona khudbad uu kaga hadlayo xaaladda guud ee Soomaaliya, gaar ahaan horumarka amniga iyo la-dagaallanka Al-Shabaab.
Sidoo kale, Madaxweyne Xasan Sheekh ayaa la filayaa inuu madasha ka caddeeyo mowqifka Soomaaliya ee ku aaddan faragelinta lagu hayo madax-bannaanida dalka, gaar ahaan aqoonsiga sharci-darrada ah ee ay Israa’iil siisay Somaliland. Inta uu ku sugan yahay Addis Ababa, madaxweynuhu wuxuu kulammo gaar gaar ah la yeelan doonaa madaxda ka qaybgalaya shirka, si looga wada hadlo danaha gaarka ah ee Soomaaliya.
Shir-madaxeedka 39-aad ee Midowga Afrika, oo ay ka soo qaybgalayaan hoggaamiyeyaasha 55-ka dal ee qaaradda, ayaa diiradda saaraya caqabadaha waaweyn ee Afrika iyo sidii xal waara loogu heli lahaa.
Safarkan ayaa imanaya kaddib markii Soomaaliya shalay loo doortay xubin ka mid ah Golaha Nabadda iyo Ammaanka Midowga Afrika (PSC) muddada 2026–2028, taas oo loo arko guul diblomaasiyadeed oo muujinaysa dib-u-soo noqoshada doorka Soomaaliya ee saaxadda qaaradda iyo tan caalamka.
