Hay’adda Isgaarsiinta Qaranka Soomaaliya (HIQ) iyo Hay’adda Teknolojiyadda iyo Isgaarsiinta ee Jamhuuriyadda Türkiye (BTK) ayaa kala saxiixday Heshiis Is-Afgarad (MoU) oo lagu xoojinayo iskaashiga labada dhinac ee isgaarsiinta elektaroonigga ah.
Heshiiskan ayaa diiradda saaraya iskaashi ku saabsan nidaaminta isgaarsiinta dayax-gacmeedka, amniga saaybarka, maareynta hirarka isgaarsiinta, hirgelinta kaabeyaasha internet-ka baahsan (broadband), adkaysiga shabakadaha, adeegyada isgaarsiinta, nidaaminta internet-ka iyo arrimo kale oo nidaamineed oo la xiriira isgaarsiinta elektaroonigga ah.
MoU-ga ayaa lagu saxiixay xarunta dhexe ee Hay’adda BTK ee Ankara, waxaana kala saxiixday Maareeyaha Guud ee HIQ, Mudane Mustafa Yaasiin Sheekh, iyo Guddoomiyaha BTK, Mudane Ömer Abdullah Karagözoğlu.
Guddoomiyaha BTK ayaa sheegay in iskaashigan uu kor u qaadayo is-weydaarsiga aqoonta iyo khibradda nidaamineed, si loo horumariyo waaxaha isgaarsiinta ee mustaqbalka fog ee Türkiye iyo Soomaaliya. Dhankiisa, Maareeyaha Guud ee HIQ ayaa xusay in heshiisku xoojinayo wada-shaqeynta hay’adeed, dhisidda awoodda shaqaalaha, is-weydaarsiga aqoonta iyo horumarinta qaab-dhismeed nidaamineed oo wax ku ool ah, si loo casriyeeyo isgaarsiinta dalka.
Kaddib saxiixa heshiiska, wafdiga HIQ ayaa la yeeshay kulammo farsamo Hay’adda BTK iyo xarumo kale oo hoos yimaada, iyagoo ka wada hadlay amniga saaybarka, ilaalinta macaamiisha, nidaaminta internet-ka iyo wadaagista khibradaha nidaamineed.
