Dowladaha Soomaaliya iyo Jabuuti ayaa maanta kala saxiixday heshiis is-afgarad (MoU) oo u dhexeeya wasaaradaha waxbarashada ee labada dal, kaas oo lagu xoojinayo iskaashiga dhinaca tacliinta sare iyo cilmibaarista.
Heshiiskan ayaa waxaa kala saxiixday Wasiirka Wasaaradda Waxbarashada, Hiddaha iyo Tacliinta Sare ee Jamhuuriyadda Federaalka Soomaaliya, Faarax Sheekh Cabdulqaadir, iyo Wasiirka Wasaaradda Tacliinta Sare iyo Cilmibaarista ee Jamhuuriyadda Jabuuti, Nabiil Maxamed Axmed. Saxiixa heshiiska ayaa ka dhacay magaalada Muqdisho, sida lagu sheegay war-saxaafadeed rasmi ah.
Heshiiska ayaa ujeeddadiisu tahay in la dhiso hannaan rasmi ah oo fududeynaya is-weydaarsiga tacliimeed iyo cilmiyeed ee u dhexeeya jaamacadaha iyo hay’adaha tacliinta sare ee labada dal.
Qodobbada ugu muhiimsan ee heshiiska waxaa ka mid ah is-weydaarsiga ardayda, macallimiinta jaamacadaha iyo cilmi-baarayaasha; taageeridda tababarro iyo barnaamijyo cilmi-baaris oo muddo gaaban ah; abaabulka shirar iyo aqoon-is-weydaarsiyo wadajir ah; hirgelinta barnaamijyo shahaado-wadaag ah (Bachelor, Master iyo PhD); iyo fududeynta deeqaha waxbarasho iyo aqoonsiga shahaadooyinka.
Labada dal ayaa sidoo kale ku heshiiyay ilaalinta xuquuqda hantida aqooneed ee ka dhalata cilmi-baarista wadajirka ah, iyagoo raacaya shuruucda qaran iyo heshiisyada caalamiga ah. Wasiirka Waxbarashada Soomaaliya ayaa sheegay in heshiiskan uu xoojinayo xiriirka walaaltinimo ee ka dhexeeya Soomaaliya iyo Jabuuti, isla markaana uu kor u qaadayo tayada waxbarashada sare iyo horumarinta cilmi-baarista. Dhankiisa, Wasiirka Tacliinta Sare ee Jabuuti ayaa sheegay in iskaashigan uu abuuri doono fursado ballaaran oo u furan ardayda iyo macallimiinta labada dal, isla markaana gacan ka geysan doono kobcinta aqoonta iyo horumarka gobolka.
