Boqortooyada Sacuudiga iyo Jamhuuriyadda Federaalka Soomaaliya ayaa kala saxiixday heshiis is-afgarad (MoU) oo ku saabsan iskaashi militari, si loo xoojiyo xiriirka difaaca iyo amniga ee u dhexeeya labada dal, sida ay sheegeen mas’uuliyiinta labada dhinac.
Heshiiskan ayaa waxaa kala saxiixday Wasiirka Gaashaandhigga Sacuudiga, Amiir Khaalid bin Salmaan, iyo Wasiirka Gaashaandhigga Soomaaliya, Axmed Macallin Fiqi.
Mas’uuliyiintu waxay tallaabadan ku tilmaameen mid muhiim u ah xoojinta iskaashiga istaraatiijiyadeed ee u dhexeeya Riyadh iyo Muqdisho.
Sida lagu sheegay faahfaahinta la bixiyay, heshiisku wuxuu diiradda saaraya tababarka iyo tayeynta Ciidamada Qalabka Sida ee Soomaaliya, iskaashi dhinaca sirdoonka iyo amniga ah, iyo wada-shaqeyn la xiriirta la-dagaallanka kooxaha hubeysan. Waxaa sidoo kale ku jira is-dhaafsi dhinaca tignoolajiyada difaaca, khibradaha militari iyo taageero farsamo.
Labada dhinac ayaa isku raacay in ay si wadajir ah uga shaqeeyaan xasilloonida gobolka iyo sugidda amniga badda, gaar ahaan marin-biyoodka istaraatiijiga ah ee Badda Cas iyo Gacanka Cadmeed.
Mas’uuliyiinta ayaa sheegay in heshiiskan cusub la filayo inuu xoojiyo awoodda hay’adaha difaaca Soomaaliya, isla markaana kor u qaado dadaallada wadajirka ah ee lagu ilaalinayo xasilloonida Geeska Afrika.
