Wararka24: 30-01-2026 Ergada Dowladda Federaalka Soomaaliya ee Qaramada Midoobay ayaa magaalada New York ku qabatay munaasabad casho-sharaf ah oo si gaar ah loogu sagootinayay muddadii bisha ahayd ee Soomaaliya hoggaamineysay Golaha Ammaanka.
Munaasabadda oo si heer sare ah loo soo agaasimay ayaa waxaa ka qeyb-galay danjireyaal iyo diblomaasiyiin ka kala socday dalal xubno ka ah Qaramada Midoobay, kuwaas oo ka mid ah beesha caalamka ee fadhigoodu yahay xarunta QM.
Danjiraha Soomaaliya u fadhiya Qaramada Midoobay, Amb. Abuukar Daahir Cusman (Baalle), oo ka hadlay xafladda, ayaa sheegay in ay sharaf weyn u tahay Soomaaliya inay mar kale hoggaamiso Golaha Ammaanka 54 sano kadib. Wuxuu xusay in tallaabadan ay astaan u tahay soo kabashada, adkeysiga iyo horumarka ay Soomaaliya gaartay sanadihii u dambeeyay.
Amb. Baalle ayaa sidoo kale carrabka ku adkeeyay in hoggaaminta Soomaaliya ee Golaha Ammaanka ay ku salaysnayd xoojinta sarreynta sharciga, ilaalinta nabadda iyo kobcinta iskaashiga caalamiga ah, xilli dunidu wajahaysay caqabado amni iyo kuwo siyaasadeed oo isa soo taraya.
Ugu dambeyntii, munaasabadda ayaa lagu soo xiray bandhig faneed ay sameeyeen hoballo Soomaaliyeed, kuwaas oo soo bandhigay heeso iyo ciyaaro dhaqameed ka tarjumaya hiddaha iyo dhaqanka Soomaaliyeed, taas oo si weyn u soo jiidatay marti-sharaftii ka qeyb-gashay, una noqotay gabagabada hoggaamintii Soomaaliya ee Golaha Ammaanka.
