Jaamacadda Ummadda Soomaaliyeed (JUS) ayaa si rasmi ah uga digtay burburin sharci-darro ah oo ka socota dhul ay ku leedahay Degmada Hodan ee Gobolka Banaadir, iyadoo sheegtay in falalkaasi ay si toos ah ugu xadgudbayaan hantideeda iyo adeegyada ardayda.
War-saxaafadeed ay Jaamacaddu soo saartay ayaa lagu caddeeyay in burburinta lagu hayo xarumo muhiim ah oo ka tirsan Jaamacadda, oo ay ku jiraan goobo adeeg arday iyo gurigii guddoomiyaha, taas oo ay ku tilmaantay mid baalmarsan sharciga.
Jaamacaddu waxay shaacisay inay qaadi doonto dhammaan tallaabooyinka sharci ee loo baahan yahay si loo ilaaliyo xuquuqdeeda milkiyadeed, loogana hortago isku dayo lagu doonayo in burburinta dhulka Jaamacadda lagu xalaaleeyo magacyo aan wax xiriir ah la lahayn.
“Maamulka Jaamacaddu wuxuu qaadayaa dhammaan tallaabooyinka sharci ee ku habboon si loo ilaaliyo xuquuqda milkiyadeed ee Jaamacadda, loogana hortago falalka sharciga baalmarsan ee lagu doonayo in dhulka Jaamacadda lagu xalaaleysto magacyo aan wax raad ah ku lahayn,” ayaa lagu yiri war-saxaafadeedka.
Ugu dambeyn, Jaamacadda Ummadda Soomaaliyeed waxay ugu baaqday shacabka Soomaaliyeed inay ka fogaadaan wax ganacsi ama heshiisyo la xiriira dhulkaas, isla markaana ay ka taxaddaraan in aan lagu marin habaabin hawlo sharci-darro ah.
