Wararka24: 26-01-2026 La-taliyaha Madaxweynaha Puntland ee arrimaha amniga, ahna Wasiirkii hore ee Amniga, Cabdi Xirsi Cali (Qarjab), ayaa ugu baaqay dhammaan saraakiisha aan hadda xilalka hayn inay si degdeg ah ugu wareejiyaan maamulka hubka iyo qalabka ay leeyihiin ciidamada dowladda.
Qarjab ayaa sheegay in marka sarkaal xil dowladeed loo magacaabo uu helo xuquuq sharci ah, balse marka xilka laga qaado ay waajib ku tahay inuu si nabad ah xilka uga dego, isla markaana ku wareejiyo hubka iyo awoodda uu hayay hay’adaha dowladda. Wuxuu carrabka ku adkeeyay in ku sii dhegganaanshaha hubka kadib marka xilka laga qaado ay tahay arrin sharci-darro ah.
“Taliyaha ama sarkaalka la magacaabay, haddii xilka laga qaado, waa inuu masuuliyadda iyo wixii hanti dowladeed ah si buuxda u wareejiyaa,” ayuu yiri Qarjab, isagoo xusay in tani ay tahay mabda’ aasaasi u ah nidaamka dowladeed.
La-taliyaha ayaa caddeeyay in qofka xilka haya uu leeyahay xuquuq ay ka mid yihiin mushaar, daryeel caafimaad iyo mararka qaar ilalin, balse uusan marnaba xaq u lahayn inuu sii haysto hub ama hanti ay leedahay ummadda marka uu xilka ka dego. “Hantida gaarka ah waa la yeelan karaa, laakiin hantida ummadda lama qaadan karo,” ayuu yiri.
Qarjab ayaa sidoo kale sheegay in qaladaadka noocan ah ay qayb ka yihiin dhibaatooyinka amni ee dalka ka jira, isagoo ku baaqay in arrimahan lagu xalliyo sharci iyo nidaam dowladeed, halkii lagu xallin lahaa awood ama is-haysi hubeysan.
Ugu dambayn, wuxuu ka digay in ku adkeysiga wax aan sharci ahayn ay sii hurin karto qalalaase iyo amni-darro, isagoo ku boorriyay saraakiisha ay quseyso inay doortaan waddada sharciga iyo mas’uuliyadda qaran.
Hadalkan ayaa kusoo aadaya xilli uu dhawaan Taliyaha Booliiska Puntland ku eedeeyay saraakiil horey xilal u soo qabtay, kuwaas oo weli mushaar ka qaata Dowladda Federaalka Soomaaliya, inay haystaan hub ay leedahay Puntland.
