Wararka24: 24-01-2026 Madaxweynaha Somaliland, Cabdiraxmaan Maxamed Cabdullaahi (Cirro), ayaa mar kale ku celiyay taageerada ay xukuumaddiisu u hayso rabitaanka Itoobiya ee ku aaddan helitaanka marin badeed, isaga oo xusay muhiimadda dekedaha ganacsiga iyo waddooyinka isku xira dalalka gobolka.
Isagoo ka hadlayay Madasha Dhaqaalaha Adduunka ee Davos 2026, Madaxweyne Cirro ayaa sheegay in Somaliland ay la leedahay Itoobiya xiriir adag oo saaxiibtinimo, isla markaana ay doonayaan in la ballaariyo iskaashiga labada dhinac, gaar ahaan dhinacyada ganacsiga iyo amniga.
Itoobiya, oo ah dal aan bad lahayn isla markaana ay ku nool yihiin in ka badan 110 milyan oo qof, ayaa muddo dheer ku tiirsaneyd dekedaha dalalka deriska ah si ay u daboolaan baahideeda dhaqaale. Madaxweyne Cirro ayaa tilmaamay in inkasta oo Addis Ababa ay inta badan adeegsan jirtay Dekedda Jabuuti, haddana Dekedda Berbera ay tahay marin istiraatiiji ah oo muhiim u ah ganacsiga gobolka.
“Waxaan aqoonsannahay baahida ay Itoobiya u qabto marin badeed, dekedo ganacsi iyo waddooyin isku xira,” ayuu yiri Madaxweyne Cirro, isaga oo intaas ku daray in Somaliland ay diyaar u tahay inay Itoobiya kala shaqeyso horumarinta kaabayaasha dhaqaale ee faa’iidada u leh labada dhinac.
Madaxweynaha Somaliland ayaa sheegay in helitaanka marin badeed oo la isku halleyn karo iyo isku xirka gaadiidka dhulku ay muhiim u yihiin koboca dhaqaalaha Itoobiya, halka Somaliland ay dhankeeda ka faa’iideysan karto kordhinta ganacsiga, maalgelin cusub iyo is-dhexgal dhaqaale oo ka dhaca Geeska Afrika.
Sannadkii 2024, Somaliland iyo Itoobiya ayaa kala saxiixday is-afgarad ujeedkiisu ahaa in Itoobiya loo oggolaado marin ay ku gaarto Badda Cas iyadoo sii mareysa Dekedda Berbera, heshiiskaas oo xambaarsanaa dhinacyo ganacsi iyo amni. Is-afgaradkaas ayaa sidoo kale xusay in beddelkiisa Itoobiya ay tixgelinayso aqoonsiga Somaliland.
Si kastaba ha ahaatee, heshiiskaas ayaa hakad galay kadib markii Dowladda Federaalka Soomaaliya ay si adag uga hortimid, iyada oo ku tilmaantay tallaabadaas mid xadgudub ku ah madax-bannaanida iyo midnimada dhuleed ee Soomaaliya.
Muqdisho ayaa ku adkaysanaysa in Somaliland ay weli tahay qeyb ka mid ah Jamhuuriyadda Federaalka Soomaaliya, mowqifkaas oo ay taageereen dalal badan oo ka tirsan beesha caalamka, kuwaas oo ka digay tallaabo kasta oo sharciyad siin karta gooni-isu-taagga.
Khilaafkan ayaa sababay xiisad diblomaasiyadeed oo cusub oo ka aloosanta Geeska Afrika, halkaas oo gacan ku haynta marinnada badda iyo waddooyinka ganacsiga ay noqdeen qodobbo xasaasi ah oo saameyn ku leh amniga iyo istiraatiijiyadda dhaqaale ee gobolka
wixii so kordha halkan kala soco WARARKA24
