Muqdisho – Wararka24: Dhacdo murugo leh ayaa maanta ka dhacday magaalada Muqdisho, kadib markii hooyo Soomaaliyeed ay ku umushay iridda hore ee Isbitaalka Banaadir, kaddib markii loo diiday adeeg caafimaad oo degdeg ah.
Goobjoogayaal ayaa sheegay in hooyada ay markii hore tagtay isbitaal kale oo magaalada ku yaalla, balse halkaas laga soo celiyay iyadoo xaaladdeedu halis ahayd.
Markii dambe ayay timid Isbitaalka Banaadir, oo ah xarun caafimaad oo dowlada maamusho, hase yeeshee waxaa lagu amray inay bannaanka ku sugto, inkastoo xaaladdeedu ay ahayd mid degdeg ah oo u baahan gargaar caafimaad oo degdeg ah.
Sida ay sheegeen dadka goobta joogay, hooyadu ugu dambayn waxay ku umushay albaabka weyn ee isbitaalka, iyadoo ay caawinaysay haweeney waayeel ah oo halkaas maraysay. Ilmaha yar ayaa lagu soo warramayaa inuu ku dhashay xaalad adag, halka hooyaduna lasoo daristay dhiig-bax daran.
Dadka deegaanka ayaa si adag u cambaareeyay dhacdada, iyagoo ku baaqay in baaritaan degdeg ah lagu sameeyo maamulka iyo shaqaalaha isbitaalka.
Waa ceeb weyn in isbitaal dowladeed oo loogu talagalay daryeelka hooyada iyo dhallaanka uu sidaan ugu dayaco muwaadiniintiisa,” ayuu yiri mid ka mid ah dadka goobta joogay.
Dhacdadan ayaa si weyn loogu faafiyay baraha bulshada, iyadoo loo arko calaamad kale oo muujinaysa hoos u dhaca daryeelka caafimaad ee bulshada Soomaaliyeed ay la tacaalayso, gaar ahaan hooyooyinka uurka leh.
