Hargeysa– Wararka24 Online)- Diyaaradda caalamiga ah ee Fly Dubai ayaa si rasmi ah u joojisay dalabkii ku saabsan eVisa-da Soomaaliya ee lagu weydiin jiray dadka u safraya magaalada Hargeysa ee caasimadda Somaliland,
kadib markii maamulka Hargeysa u qabtay shirkadda muddada 15 maalmood ah inay joojiso ama laga mamnuuco duulimaadyada gudaha Somaliland.
Wararka laga helayo rakaabkii saakay ka baxay Dubai kuna sii jeeday Hargeysa ayaa xaqiijiyay in aan qofna la weydiin eVisa, taasoo muujinaysa in Fly Dubai ay fulisay shuruudihii ay xukuumadda Somaliland u dirtay.
Tallaabadan ayaa timid kadib markii maamulka Somaliland uu si adag uga horyimid go’aankii hore ee Fly Dubai oo dadkii u socday Hargeysa ku khasbeysay inay soo qaatan dal ku galka Soomaaliya, arrin ay Hargeysa ku tilmaantay mid “ka hor imaanaysa madax-bannaanideeda siyaasadeed iyo nidaamkeeda socdaalka.”
Sidoo kale, diyaaradda Itoobiya (Ethiopian Airlines), oo duulimaadyo maalinle ah ku tagta Hargeysa laba jeer maalintii, ayaa dhawaan joojisay ku-xujeynta rakaabka ee ku saabsan eVisa-da Soomaaliya, kadib cadaadis ka yimid maamulka Somaliland.
Go’aanka Fly Dubai ayaa loo arkaa guul diblomaasiyadeed oo ay xukuumadda Somaliland ku difaacday siyaasaddeeda socdaalka, iyadoo dadka safarka ah hadda si toos ah ugu gudbi kara Hargeysa iyada oo aan loo baahnayn dal ku galka Soomaaliya.
