Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in la gaaray waqtigii Soomaaliya ay ka gudbi lahayd nidaamka awood-qaybsiga ee 4.5,
Isagoo ku tilmaamay mid Uu waqtigiisa dhamaaday oo hor istaag ku ah dhismaha dowlad casri ah oo ku dhisan sinnaanta, cadaaladda, iyo hufnaanta.
Madaxweynaha oo ka hadlayay magaalada Carta ee dalka Jabuuti, halkaas oo uu kaga qeyb galay munaasabad lagu xusayay shirweynihii nabadda ee 2000, ayaa sheegay in nidaamka 4.5 uu Soomaaliya kusoo caawiyay xilli adag, balse uu ahaa xal ku-meelgaar ah oo aan sii shaqayn karin.
Madaxweynaha ayaa yidhi, 4.5 wuxuu yimid maalin aysan Soomaalidu waxba haysan, wuxuuna ahaa xal labo sano ku-meelgaar ah oo lagu soo gudbo. Laakiin muddo dheer ayuu nagu qaatay, waxaana la joogaa xilligii aan dhisi lahayn nidaam ku dhisan hufnaan, cadaalad iyo midnimo qaran,” ayuu yiri Madaxweyne Xasan Sheekh.
Madaxweynaha ayaa ku booriyay hoggaamiyeyaasha iyo bulshada Soomaaliyeed inay ka saaraan siyaasadda danaha shakhsiga iyo qabiilka, si loo abuuro nidaam mideeya ummadda.
Wuxuu xusay in isbeddel dhab ah uu imanayo marka la dhiso dowlad ku saleysan karti iyo aqoon, halkii ay ku tiirsanaan lahayd nidaamyo ku dhisan tirada beelaha.
“Si aan uga gudubno 4.5 waa in aan meesha ka saarno siyaasadda qofka iyo qabiilka. Soomaaliya maanta waxay haysaa fursad ay ku qaaddo wadadii toosnayd ee dawladnimada casriga ah,” ayuu raaciyay Madaxweyne Xasan Sheekh Maxamuud.
Madaxweynaha ayaa hadalkan ka jeediyay goob taariikhi ah oo lagu xasuusto bilowgii dowladnimada casriga ah ee Soomaaliya, isagoo ku baaqay in Carta maanta noqoto meel kale oo lagu diro fariin cusub oo ah “dib u dhiska nidaam mideeya qaranka.”
