Laascaanood –(Wararka24):-Madaxweynaha maamulka Waqooyi Bari Soomaaliya, Cabdiqaadir Axmed Cali (Firdhiye), ayaa Isniin, 20-ka Oktoobar 2025, magacaabay golihiisa wasiirrada cusub oo ka kooban 21 xubnood, sida lagu sheegay wareegto rasmi ah oo kasoo baxday xafiiskiisa.
Liiska wasiirrada cusub ayaa waxaa ku jira hal haweeney, halka xubno kale ay yihiin xildhibaano iyo wasiiro hore uga tirsanaa maamulka Puntland. Madaxweynaha ayaa sheegay in magacaabistan ay tahay tallaabo lagu dhisayo xukuumad isku dhafan oo ka tarjumaysa danaha bulshada deegaanka.
Madaxweyne Firdhiye ayaa dib u soo celiyay qaar kamid ah wasiirradii hore ee maamulka SSC-Khaatumo, isagoo sheegay in ay muhiim tahay in la dhiso dowlad mideysa bulshada oo ka turjumaysa wadajir iyo wada-tashi.
Sida ay wararku sheegayaan, weli lama magacaabin wasiir ku-xigeennada iyo wasiirro-dowlayaasha maamulka, balse waxaa la filayaa in lagu dhawaaqo maalmaha soo socda si loo dhammaystiro xukuumadda cusub.
Ka hor magacaabista Golaha Wasiirrada, Madaxweyne Firdhiye iyo Madaxweyne ku xigeenkiisa Abwaan Cabdirashiid ayaa la sheegay isku khilaafay saami-qeybsiga xubnaha golaha, inkastoo khilaafkaas markii dambe xal laga gaaray.
Maalinta Isniinta ayaa lagu wadaa in lagu dhaariyo wasiirrada cusub, kuwaas oo intooda badan ku sugan magaalada Laascaanood, halkaas oo lagu wado in ay si rasmi ah ugu dhaartaan xilalkooda hortiisa Madaxweynaha.
