Muqdisho – Dowladda Federaalka Soomaaliya ayaa galinkii dambe ee shalay magaalada Muqdisho kusoo dhoweysay 148 muwaadiniin Soomaaliyeed oo laga soo daadgureeyay dalka Yemen, iyadoo kaashaneysa hay’adaha gargaarka caalamiga ah.
Muwaadiniintan oo isugu jira rag, dumar iyo carruur ayaa lagu soo celiyay diyaarad khaas ah oo si toos ah uga timid Yemen, kadib markii ay halkaas kala kulmeen xaalado nololeed oo adag.
Munaasabadda soo dhoweynta waxaa ka qeyb galay mas’uuliyiin ka tirsan dowladda, oo uu hoggaaminayay Wasiirka Arrimaha Dibadda Soomaaliya Cabdisalaan Cabdi Cali, kaas oo muwaadiniinta ku qaabilay garoonka diyaaradaha Aadan Cadde ee Muqdisho.
Dib-u-celinta waxaa si wadajir ah u fuliyay Guddiga Qaranka ee Qaxootiga iyo Barakacayaasha (NCRI), Hay’adda Qaramada Midoobay u qaabilsan Qaxootiga (UNHCR) iyo Hay’adda Socdaalka Adduunka (IOM).
Wasiir Cabdisalaan Cabdi Cali oo la hadlay warbaahinta ayaa sheegay in dowladda Soomaaliya ay ka go’an tahay dib u soo celinta muwaadiniinta Soomaaliyeed ee ku dhibban dalalka kale. “Waxaan ku faraxsanahay in aan maanta ku soo dhoweyno muwaadiniin Soomaaliyeed oo ku dhibaateysnaa Yemen.
Dowladda waxay dammaanad qaadaysaa nolosha iyo daryeelka dadkaas inta ay si nabad ah ugu laabanayaan deegaannadooda,” ayuu yiri wasiirka.
Muwaadiniintan ayaa qayb ka ah Soomaalida sannadihii la soo dhaafay dhibaatada kala kulmay colaadaha iyo duruufaha adag ee ka taagan Yemen.
Bishii hore, dowladda Soomaaliya ayaa sidoo kale dalka dib ugu soo celisay 173 muwaadiniin oo laga sii daayay xabsiyada dalka Libya, kuwaas oo muddo dheer ku jiray xaalado adag. Dowladda ayaa ku guuleysatay dadaal dheer oo lagu soo badbaadiyay dhalinyaradaasi..
