Muqdisho (Wararka24)– Wararkii ugu dambeeyay ayaa sheegaya in caawa burbur ku soo dhammaadeen wadahadalladii u dhexeyay Madaxweynaha Soomaaliya Xasan Sheekh Maxamuud iyo Madaxweynaha Jubbaland Axmed Maxamed Islaam (Axmed Madoobe).
Kulanka oo ka dhacay Kismaayo ayaa socday in ka badan afar saacadood, balse lagu kala kacay iyadoo aan wax is-afgarad ah laga gaarin qodobadii la isku hayay.
Ilo ku dhow wadaxaajoodyada ayaa sheegay in Madaxweyne Xasan Sheekh uu Axmed Madoobe ku wargeliyay in dib loogu laaban doono doorashadiisii, islamarkaana Jubbaland ay sido kale u diyaar garowdo doorasho qof iyo cod ah oo laga qabto deegaannada maamulkaasi.
Axmed Madoobe ayaa dhankiisa si cad u sheegay inuusan marna aqbali doonin in doorashadiisa lagu noqdo, wuxuuna ku adkeystay in dowladda federaalka ay aqbasho natiijada doorashadii hore, isla markaana laga laabto go’aankii maxkamadda Gobolka Banaadir ay hore u soo saartay ee la xiriirtay in isga lagu xiraayo.
Kulanka ayaa sidaas lagu soo afjaray, iyadoo warar hordhac ah ay tilmaamayaan in taliyeyaasha sirdoonka Kenya iyo Itoobiya oo dhexdhexaadiye ka ahaa wada-hadallada ay mar kale isku dayi doonaan inay labada dhinac ku qanciyaan wadahadal kale.
Madaxweyne Xasan Sheekh ayaa la filayaa inuu safarkiisa Kismaayo si degdeg ah u soo gaabiyo, haddii aan wax isbeddel ah laga gaarin xaaladda caawa illaa berrito galinka hore. Madaxweynaha ayaa lagu wadaa inuu dib ugu laabto Muqdisho si uu ula tashado Golaha Wasiirrada ee xukuumadda Danqaran.
