Madaxweynaha Jamhuuriyadda Somaliland, Cabdiraxmaan Maxamed Cabdilaahi Cirro, iyo wafdi ballaadhan oo uu hoggaaminayo oo maalintii labaad safar shaqo ku jooga magaalada Burco ayaa dhagax-dhigay mashruuc taariikhi ah oo ah cusbitaal casri ah oo takhasusyo badan leh. Cusbitaalkan, oo noqon doona kii ugu weynaa uguna horumarsanaa ee Somaliland iyo guud ahaan dhulka Soomaalida laga dhiso, waxaa maalgelinaya Amiirka dalka Isu-tagga Imaaraadka Carabta, Sheekh Maxammed Bin Zayed Al Nahyan, isla markaana isaga ayaa cusbitaalka loogu magac dari doonaa.
Dhakhtarkan cusub ayaa loogu talagalay inuu bixiyo adeegyo caafimaad oo takhasusyo kala duwan ah, tayadiisuna ay sarreyso aqoon ahaan iyo qalab ahaanba, taas oo ka dhigan in bulshada Somaliland looga baahnaan doono adeegyo caafimaad oo dibadda loo raadsado.
Madaxweyne Cirro ayaa sheegay in mashruucani uu faa’iido weyn u yeelan doono bulshada Somaliland, gaar ahaan dadka ku nool Burco iyo gobollada Bariga, maadaama ay heli doonaan daryeel caafimaad oo tayo sare leh.
Madaxweynuhu waxa kale oo uu xusay in dhismaha cusbitaalkan casriga ahi uu qayb ka yahay ballanqaadkii xukuumadda oo dhab noqday iyo dedaallada lagu xoojinayo kaabeyaasha caafimaadka iyo horumarinta adeegyada lagama maarmaanka u ah nolosha bulshada. Ugu dambayntiina, waxa uu shacabka Burco ku bogaadiyey dedaalkooda, midnimadooda iyo kaalinta muuqata ee ay ku leeyihiin horumarinta dalka.
