Taliyaha hay’adda Nabad Sugidda iyo Sirdoonka Qaranka (NISA), Cabdullaahi Maxamed Cali (Sanbaloolshe), ayaa maanta booqasho rasmi ah ku tagay degmada Moqokori ee gobolka Hiiraan. Halkaas ayuu kulan gaar ah kula yeeshay saraakiil sare oo ka tirsan ciidamada Xoogga Dalka Soomaaliyeed iyo kuwa deegaanka.
Kulanka oo ka dhacay xarun ciidan oo si gaar ah loo adkeeyay ammaankeeda, ayaa lagu falanqeeyay xaaladda guud ee gobolka, gaar ahaan dagaalka lagula jiro Al-Shabaab iyo istaraatijiyad cusub oo lagu xoojinayo gulufka militari ee ka socda qeybo badan oo ka tirsan Hiiraan.
Taliyaha NISA ayaa saraakiisha kula dardaarmay in ay sii xoojiyaan wada shaqeynta iyo isku xirnaanta hay’adaha ammaanka. Wuxuu carabka ku adkeeyay in wadajirkaasi yahay mid lagama maarmaan u ah xaqiijinta guulo waaweyn oo laga gaaro kooxaha argagixisada Sidoo kale, Sanbaloolshe wuxuu bogaadiyay geesinimada ciidamada iyo kaalinta muhiimka ah ee ay ka qaadanayaan difaaca dalka.
Wuxuu ku nuuxnuuxsaday in shacabka deegaanka ay yihiin tiir adag oo lagu xasili karo meelaha laga xoreeyay Al-Shabaab.
Warar lagu kalsoon yahay ayaa sheegaya in kulanka kadib la isku raacay howlgal ballaaran oo dhowaan laga bilaabi doono deegaanno muhiim ah, si loo ciribtiro firxadayaal ka tirsan Al-Shabaab oo la tuhunsan yahay inay ku dhuumaaleysanayaan dhulka miyiga ah.
Moqokori ayaa hadda noqotay saldhig muhiim ah oo loo adeegsado qorsheyaasha amniga, iyadoo ciidamada dowladda iyo kuwa deegaanka ay ka wadaan diyaar garow xooggan si ay ugu talaabsadaan horumar muuqda.
