Kenya ayaa taageertay qorshe cusub oo lagu kordhinayo maalgelinta Midowga Afrika, si ururku uga madax bannaanaado ku tiirsanaanta deeq bixiyeyaasha dibadda.
Taageeradan waxaa ku dhawaaqay Wasiirka Koowaad ee Golaha Wasiirrada iyo Wasiirka Arrimaha Dibadda Kenya, Musalia Mudavadi, oo ka hadlay shir gaar ah oo ay ku yeesheen Golaha Fulinta ee Midowga Afrika iyo wasiirrada maaliyadda Afrika.
Shirka oo looga hadlayay maalgelinta ururka ayaa ka dhacay magaalada Accra ee dalka Ghana.
Mudavadi ayaa shirka uga hadlay magaca Madaxweyne William Ruto, oo Midowga Afrika u ah horjoogaha dib u habeynta hay’adaha ururka. Waxaa la socday Wasiirka Maaliyadda Kenya, John Mbadi.
“Afrika waa inay haysataa awood ay ku maalgeliso Afrikada ay higsanayso,” ayuu yiri Mudavadi.
Kenya ayaa taageertay qorshe loo yaqaan “Doorashada C,” oo Mudavadi ku tilmaamay jid suurtagal ah oo lagu gaari karo Midowga Afrika oo dhaqaale ahaan waara.
Qorshahan ayaa ka kooban afar tiir oo isku xiran, oo ay ku jirto miisaaniyad mideysan oo lagu dhisay qorshe kharash oo muddo dhexe ah.
Kenya ayaa sidoo kale taageertay canshuur dhan 0.2 boqolkiiba oo lagu soo rogo alaabooyinka qaarkood ee dalalka Afrika soo galaya, taasoo lacagteeda loo isticmaali doono maalgelinta ururka.
Waxay sidoo kale taageertay in la dhiso sanduuq dhan hal bilyan oo doollar oo loogu talagalay Sanduuqa Nabadda ee Midowga Afrika, kaas oo si joogto ah loo buuxin doono.
“Tallaabooyinkan waxaa loogu talagalay inay ururka siiyaan ilo lacageed oo la isku halleyn karo,” ayuu yiri Mudavadi.
Kenya ayaa sidoo kale ku baaqday in la yareeyo howlaha isku dhaca ee ururka, si uu u noqdo mid fudud oo hufan.
Go’aanno hore oo lagu kordhinayay saamiga dalalka xubnaha ka ah ay ku bixiyaan maalgelinta ururka ayaan si buuxda loo fulin.
Shirka ayaa la filayaa inuu talooyin u gudbiyo shirka 40-aad ee madaxda dalalka Midowga Afrika, oo dhici doona bisha Janaayo 2027.
Doodda maalgelinta ayaa si gaar ah muhiim ugu ah Soomaaliya, xilli howlgalka AUSSOM uu wajahayo yaraan lacageed oo halis gelin karta dagaalka ka dhanka ah Al-Shabaab.
Midowga Afrika iyo Midowga Yurub ayaa horraantii bishan ka digay in yaraanta maalgelinta ay dib u celin karto horumarka laga gaaray Soomaaliya, iyagoo ku baaqay in howlgallada nabadda la siiyo lacag joogto ah oo la saadaalin karo.
