Dowladda Uganda ayaa beenisay warar lagu faafiyay baraha bulshada oo sheegayay in askar Ugandan ah lagu dilay weerar ka dhacay Somaaliya, xilli ay ka baxayeen gobolka Shabeellaha Hoose.
Wararka ayaa sheegayay in dagaalyahanno ka tirsan Al-Shabaab ay gaadmo u dhigeen kolonyo ciidamo Ugandan ah oo ka tirsan howlgalka AUSSOM, iyagoo sheegay in 10 ilaa 11 askari ay ku dhinteen.
Ku xigeenka agaasimaha fulinta ee Xarunta Warbaahinta Uganda, Dennis Katungi, ayaa Jimcihii shir jaraa’id oo uu ku qabtay magaalada Kampala ku sheegay in wararkaas ay yihiin been.
Katungi ayaa sheegay in Uganda ay diiday wararka internetka lagu faafiyay, isagoo ku eedeeyay Al-Shabaab inay tahay cidda faafisay.
Ilaa hadda lama helin wax xaqiijin madax bannaan ah oo ku saabsan weerarka la sheegay, Al-Shabaabna si rasmi ah ugama aysan hadlin.
Beeninta ayaa timid xilli Uganda ay ku jirto bixitaanka ciidamadeeda Soomaaliya.
2-da Noofembar, Gashaanle Sare Chris Magezi, oo ah agaasimaha ku meel gaarka ah ee macluumaadka difaaca ee Uganda, ayaa sheegay in ciidamada Uganda ay bilaabeen inay ka baxaan Soomaaliya.
Wuxuu sheegay in marka hore ay bixi doonaan ciidamada ku jooga heshiiska laba geesoodka ah ee Kampala iyo Muqdisho, halka kuwa ka tirsan AUSSOM ay si tartiib tartiib ah dalka uga bixi doonaan dhammaadka sannadka 2027.
4-ta Noofembar, La taliyaha Amniga Qaranka ee Soomaaliya, Aweys Xaaji Yuusuf, ayaa sheegay in ciidamada hadda dalka ka baxaya ay inta badan yihiin kuwa heshiiska laba geesoodka ah, isla markaana ciidamada Uganda ee AUSSOM ay weli dalka ku sugan yihiin.
Uganda ayaa leh qiyaastii 4,500 askari oo ka tirsan AUSSOM, taas oo ah kooxda ugu badan howlgalka. Ciidamadaasi waxay inta badan ka howlgalaan gobolka Banaadir iyo Shabeellaha Hoose.
Jadwalka Uganda ayaa ka horreeya qorshaha guud ee AUSSOM, kaas oo dhigaya in howlgalku si buuxda uga baxo Soomaaliya dhammaadka sannadka 2029, iyadoo ku xiran xaaladda amniga.
Uganda ayaa ahayd dalkii ugu horreeyay ee ciidamo u soo diray howlgalka Midowga Afrika ee Soomaaliya, bishii Maarso 2007.
Howlgalkaas oo markii hore loo yaqaannay AMISOM, ayaa markii dambe noqday ATMIS, kadibna AUSSOM, oo howlgalkiisa bilaabay bishii Janaayo 2025.
Bixitaanka Uganda ayaa walaac ka dhex abuuray khubarada amniga, kuwaas oo ka cabsi qaba in uu kal amni ka dhaco deegaannada Shabeellaha Hoose, xilli ay ciidamada Mareykankana ka baxeen saldhigga Baledoogle.
