Wararka24: Warbaahinta Israa’iil ayaa sheegtay in la soo gabagabeeyay tirinta codadka doorashadii ka dhacday Israa’iil, iyadoo aanay dhinaca Ra’iisul Wasaare Benjamin Netanyahu iyo dhinaca mucaaradkuba helin aqlabiyad baarlamaani ah.
Xilli natiijooyinka hordhaca ah la shaacinayay maalintii Khamiista, siyaasiyiinta mucaaradka ayaa kulmay si ay uga wada hadlaan fursadaha lagu dhisi karo isbahaysi siyaasadeed.
Wargeyska Haaretz ee ka soo baxa Israa’iil ayaa qoray in ka dib markii la tiriyay in ka badan 99 boqolkiiba codadkii la dhiibtay maalintii Talaadada, isbahaysiga Netanyahu uu helay 53 kursi oo ka mid ah 120-ka kursi ee baarlamaanka, halka dhinaca mucaaradka oo uu hoggaaminayo Gadi Eisenkot ay heleen 48 kursi. Waxaa intaas lagu daray in xisbiyada matala Carabta ay iyaguna wada heleen 19 kursi.
Labada dhinacba, isbahaysiga Netanyahu iyo xisbiyada mucaaradka, waxay ku guuldareysteen inay helaan 61-da kursi ee looga baahan yahay in lagu helo aqlabiyad baarlamaani ah.
Natiijooyinka rasmiga ah ee doorashada ayaa la xaqiijin doonaa oo la shaacin doonaa marka la gaaro maalinta Arbacada. Ilaa waqtigaas, natiijooyinku way isbeddeli karaan.
Doorashadii dhacday maalintii Talaadada, taas oo ahayd tii ugu horreysay tan iyo weerarradii 7-dii Oktoobar 2023 lagu qaaday koonfurta Israa’iil iyo billowgii dagaalka xasuuqa ah ee Israa’iil ay ku hayso Gaza.
Isbahaysi cusub oo la filaaya
Khamiistii, Eisenkot, oo ah madaxa xisbiga Yashar, ayaa la kulmay Ra’iisul Wasaarihii hore Naftali Bennett, oo hoggaamiya xisbiga Together, si ay uga wada hadlaan siyaabaha loo dhisi karo dowlad cusub, sida lagu sheegay bayaan ay soo saartay warbaahinta Ynet News ee Israa’iil.
Eisenkot wuxuu sidoo kale la kulmay guddoomiyaha xisbiga Dimuqraadiga Yair Golan, oo ah xubinta kaliya ee isbahaysiga mucaaradka ah ee taageeray sameynta isbahaysi ay la leeyihiin xisbiyada ay hoggaaminayaan muwaadiniinta Falastiiniyiinta ee Israa’iil, halka dhammaan kooxaha kale ee siyaasadeed ay diideen midow noocaas ah.
