Wararka24: Booliiska Nigeria ayaa sheegay in la soo badbaadiyay 20 dhalinyaro ah oo u diyaargaroobayay barnaamijka Adeegga Qaranka ee Dhalinyarada (NYSC), kuwaas oo toddobaad ka hor lagu afduubtay gobolka Imo ee koonfur-bari dalka.
Dhalinyaradan oo ka qalin-jabisay jaamacad ayaa 1-dii October laba bas oo uga baxay magaalada Ibadan ee gobolka Oyo, kuna wajahnaa xeryaha tababarka NYSC ee gobollada Abia iyo Akwa Ibom. Rag hubeysan ayaa jidka ku weeraray basaska, waxaana 20-ka qof loo kaxeystay dhul kaymo ah.
Afhayeenka Ciidanka Booliiska Nigeria, Ani Iniedu, ayaa sheegay in dadka la afduubtay lagu soo badbaadiyay 7-dii October deegaanka Amakohia Ubi ee gobolka Imo, kadib hawlgal wadajir ah oo ay sameeyeen booliiska iyo hay’adaha kale ee amniga. Dhalinyarada ayaa markii la soo badbaadiyay loo qaaday baaritaan caafimaad iyo daryeel.
Booliiska faahfaahin dhammeystiran kama ay bixinin hawlgalka lagu soo badbaadiyay dhalinyarada, sidoo kalena ma aysan xaqiijin in madax-furasho la bixiyay. Hay’adaha ammaanka ayaa sheegay in dadaalladu socdaan si loo soo qabto dadka ka dambeeyay afduubka.
Maalmo ka hor, booliiska gobolka Imo waxay sheegeen inay heleen goobta lagu hayay dhalinyarada kadib markii diyaarado aan duuliye lahayn loo adeegsaday dabagalka. Hawlgalka ayaa markaas dib u dhacay kadib markii ciidamada ay heleen xog sheegaysa in goobta lagu aasay walxaha qarxa, taas oo khatar ku ahayd dadka la haystay iyo ciidamada isku dayayay inay soo badbaadiyaan.
Wararka madax furashada ayaa ahaa kuwo is khilaafsan. Qoysaska qaar ayaa sheegay in afduubayaashu markii hore dalbadeen lacag aad u badan, balse warbixinno dambe ay tilmaameen in dalabku hoos u dhacay. Qaar ka mid ah qoysaska ayaa sheegay in lacag la bixiyay ka hor sii deynta, halka booliisku aysan xaqiijin arrintaas.
NYSC waa barnaamij qaran oo hal sano ah oo inta badan qalin-jabiyeyaasha Nigeria looga baahan yahay inay ka qeybqaataan, waxaana dhalinyarada loo diraa gobollo kala duwan si ay uga shaqeeyaan adeegyada bulshada iyo hay’adaha dowladda.
Afduubka loo geysto dadka si madax-furasho looga helo ayaa weli ah caqabad amni oo ka jirta qaybo ka mid ah Nigeria. Dhacdadan ayaa sidoo kale sare u qaadday walaaca laga qabo ammaanka waddooyinka ku yaalla koonfur-bari dalka, iyadoo ciidamada ammaanku ay wadaan baaritaanno lagu raadinayo kooxihii ka dambeeyay afduubka
