Wararka24: Ra’iisul Wasaaraha Israa’iil Benjamin Netanyahu ayaa Axaddii 27-kii Sebtembar si aan hore loo shaacin ugu safray Abu Dhabi, halkaas oo uu kulan kula yeeshay Madaxweynaha Imaaraadka Carabta, Sheekh Maxamed bin Zayed Al Nahyan. Booqashada ayaa markii hore laga soo wariyay warbaahinta Israa’iil, waxaana markii dambe xaqiijiyay Imaaraadka oo sheegay in labada hoggaamiye ay ka wada hadleen xiriirka labada dal iyo arrimaha gobolka.
Sida ay sheegeen ilo laga soo xigtay warbaahinta Israa’iil iyo Mareykanka, kulanka ayaa si gaar ah diiradda loogu saaray Iran iyo xaaladda gobolka. Warbixinno kale ayaa sheegay in Netanyahu uu doonayay inuu Abu Dhabi kula yeesho kulan fool ka fool ah Maxamed bin Zayed, xilli Israa’iil ay wax ka yar bil u jirto doorashooyinka baarlamaanka.
Baaritaan ah in Maxamed bin Zayed uu hore Netanyahu uga digay weerarkii Xamaas ee 7-dii Oktoobar 2023
Booqashadu waxay timid toddobaadyo kaddib markii wargeyska Haaretz uu daabacay baaritaan uu ku sheegay in Maxamed bin Zayed uu Netanyahu uga digay, in hoggaamiyaha Xamaas Yahya Sinwar uu qorsheynayay hawlgal weyn ka hor weerarkii Xamaas ee 7-dii Oktoobar 2023. Netanyahu ayaa si adag u beeniyay eeddaas, wuxuuna sheegay in warku yahay been, isagoo sidoo kale qaaday.
Baaritaanka Haaretz, oo ku salaysan xog ay soo ururiyeen saxafiyiinta Shlomi Eldar iyo Ruth Yuval, ayaa sheegay in fariin ka timid Sinwar ay gaartay dhinaca Imaaraadka, kaddibna loo gudbiyay madaxda Israa’iil. Warbixintu waxay sheegtay in digniinta la gaarsiiyay hay’adda Shin Bet 15-kii Sebtembar 2023, balse qiimayntii waqtigaas ay ahayd in Sinwar laga yaabo inuu ka hadlayay hawlgal xaddidan, halkii laga filan lahaa weerar ballaaran.
Sida uu qoray Haaretz, Maxamed bin Zayed ayaa markii dambe si toos ah ula xiriiray Netanyahu, waxaana wada-hadalka lagu sheegay inuu socday ku dhowaad 45 daqiiqo. Warbixintu waxay ku andacootay in madaxweynaha Imaaraadku ka digay in hawlgalka Xamaas uu keeni karo dhiig badan iyo xasillooni-darro gobolka, balse Netanyahu uu sheegay in Israa’iil ay diyaar u tahay xaaladaha suuragalka ah.
Netanyahu oo beeniyay edheymaha ah in uu helay digniin noocaas ah
Netanyahu ayaa diiday in uu helay digniin noocaas ah, halka warbixinta Haaretz ay weli tahay arrin muran ka taagan yahay oo aan si madax-bannaan loo xaqiijin dhammaan faahfaahinadooda. Warbaahin kale ayaa sidoo kale soo werisay in Masar ay xilligaas Israa’iil uga digtay xaaladda sii xumaanaysa ee Gaza, inkastoo faahfaahinta digniinaha iyo sida loo qiimeeyay ay ku kala duwan yihiin warbixinnada.
Imaaraadka ayaa markii hore ka gaabsaday inuu faallo ka bixiyo wararka kulanka, balse wakaaladda wararka rasmiga ah ee WAM ayaa markii dambe xaqiijisay booqashada, iyadoo sheegtay in labada dhinac ay ka wada hadleen xoojinta xiriirka iyo arrimaha labada dhinac. Abu Dhabi waxay sidoo kale sheegtay in labada dowladood ay leeyihiin xiriirro isgaarsiineed oo furan oo toos ah tan iyo heshiisyadii Abraham ee 2020.
Booqashada Netanyahu waxay ku soo beegmaysaa xilli siyaasadda gudaha Israa’iil ay aad ugu mashquulsan tahay arrimaha amniga iyo masuuliyadda weerarkii 7-dii Oktoobar. Mucaaradka Netanyahu ayaa dalbanaya in la baaro digniinihii la sheegay in la helay iyo sida ay dowladda iyo hay’adaha ammaanku uga jawaabeen, halka Netanyahu iyo xafiiskiisu ay diidayaan eedaha ah in isaga si toos ah loogu gudbiyay digniin cad oo ku saabsan weerarka.
