Wararka24: Philippe Coutinho ayaa ku biiray Santos FC, isagoo dib ula midoobay saaxiibkiis iyo xiddigga xulka Brazil, Neymar, waxaana uu kooxda la sii joogayaa ilaa dhammaadka xilli ciyaareedka.
Coutinho, oo 34 sano jir ah, ayaa ahaa ciyaaryahan xor ah tan iyo markii uu ka tagay Vasco da Gama bishii Febraayo. Ciyaaryahankii hore ee Liverpool iyo Barcelona ayaa sanadkii 2024 dib ugu laabtay Vasco, oo ah kooxdii uu ku soo barbaaray, balse wuxuu ka tagay kadib markii uu u saftay 81 kulan, isagoo sheegay inuu dareemayay daal dhanka maskaxda ah.
Santos ayaa si gaar ah u soo dhaweysay Coutinho, iyadoo baraha bulshada ku baahisay sawir hore oo muujinaya Coutinho iyo Neymar oo dhalinyaro ah. Kooxdu waxay sidoo kale soo bandhigtay sawir cusub oo ay labada ciyaaryahan ku celinayaan isla qaabkii sawirkii hore, iyagoo ku jira goobta jimicsiga.
Santos ayaa intaas sii raacisay muuqaal muujinaya Coutinho oo galaya qolka labiska kooxda, halkaas oo Neymar uu si diirran ugu soo dhaweeyay oo uu laabta geliyay. Coutinho ayaa xilligaas yiri: “Haddii ay tani riyo tahay, ma doonayo inaan ka soo tooso.”
Neymar ayaa dib ugu laabtay Santos bishii Janaayo ee sanadkii hore, iyadoo kooxda ay tahay meeshii uu ku soo barbaaray kuna bilaabay xirfaddiisa heerka sare. Ku biirista Coutinho ayaa ka dhigan markii ugu horreysay ee labada saaxiib ay si wadajir ah ugu ciyaaraan koox heer sare ah.
Coutinho ayaa xirfaddiisa ka bilaabay Vasco da Gama, ka hor inta uusan u dhaqaaqin Inter Milan. Sannadkii 2013 ayuu ku biiray Liverpool, halkaas oo uu ka dhaliyay 54 gool 201 kulan oo uu saftay, isagoo noqday mid ka mid ah ciyaartoydii muhiimka ahaa ee kooxda.
Sannadkii 2018 ayuu Coutinho ku biiray Barcelona heshiis lagu sheegay inuu gaarayay £142 milyan. Wuxuu markii dambe soo maray Bayern Munich, Aston Villa iyo Al-Duhail, ka hor inta uusan mar kale dib ugu laaban Vasco da Gama.
Ku biirista Santos waxay Coutinho siisay fursad uu mar kale garoonka kula wadaago Neymar, iyadoo taageerayaasha kooxda ay si weyn u sugayaan kulankooda ugu horreeya ee ay labadoodu si wadajir ah u ciyaaraan.
