Wararka24: Madaxweynaha Soomaaliya Xasan Sheekh Maxamuud ayaa lagu wadaa inuu u ambabaxo dalka Mareykanka, halkaas oo uu kaga qeyb-geli doono shirka Golaha Guud ee Qaramada Midoobay, iyadoo magaalada New York uu haatan ku sugan yahay Madaxweynaha Somaliland, Cabdiraxmaan Maxamed Cabdillaahi (Cirro).
Safarka Madaxweynaha Soomaaliya ayaa ku soo aadaya xilli Soomaaliya ay xubin aan joogto ahayn ka tahay Golaha Ammaanka ee Qaramada Midoobay. Dowladda Federaalka ayaa la filayaa inay xubinnimadaas iyo ka qeyb-galka shirka Golaha Guud uga faa’iideysato sidii ay beesha caalamka ugu soo bandhigi lahayd arrimaha mudnaanta u leh Soomaaliya.
Xasan Sheekh ayaa la filayaa inuu khudbad ka jeediyo madasha Qaramada Midoobay, isagoo diiradda saari doona xaaladda Soomaaliya iyo dadaallada dowladda ee la xiriira amniga. Waxaa sidoo kale la filayaa in uu ka hadlo baahida loo qabo taageero dheeraad ah oo ku aaddan la dagaallanka Al-Shabaab iyo xoojinta hay’adaha amniga.
Dhinaca kale, dowladda Soomaaliya waxay doonaysaa in madasha caalamiga ah lagu muujiyo xaaladda bani’aadamnimo ee dalka iyo baahida loo qabo taageero dheeraad ah. Arrimaha horumarinta dhaqaalaha iyo dhiirrigelinta maalgashiga caalamiga ah ayaa sidoo kale ka mid noqon kara qodobada ay Muqdisho doonayso inay xoojiso.
Xubinnimada Soomaaliya ee Golaha Ammaanka ayaa kordhisay muhiimadda ka qeyb-galka madaxda Soomaaliya ee kulamada Qaramada Midoobay. Muqdisho waxay hadda si toos ah uga qeyb qaadan kartaa doodaha iyo go’aannada la xiriira nabadda iyo amniga caalamka, iyadoo muddada xubinnimada Soomaaliya ay ku eg tahay 31-ka December 2026.
Kulamada Golaha Guud ee Qaramada Midoobay ayaa furmaya 8-da September, halka doodaha guud ee madaxda dalalka ay bilaabanayaan 22-ka September, waxaana qorshuhu yahay inay socdaan illaa 28-ka September.
Inta uu ku sugan yahay Mareykanka, Madaxweyne Xasan Sheekh ayaa sidoo kale la filayaa inuu kulamo gaar-gaar ah iyo kuwo dhinacyo badan ah la yeesho madaxda iyo saraakiisha Qaramada Midoobay, dowladda Mareykanka iyo madaxda dalal kale.
Safarka ayaa imanaya iyadoo New York ay sidoo kale ku sugan yihiin masuuliyiin iyo madax ka kala socda dalal badan, waxaana indhaha lagu hayaa kulamada iyo ajandayaasha ay madaxda Soomaaliya iyo Somaliland ku yeelan karaan magaalada.
Dowladda Federaalka ayaa rajaynaysa in ka qeyb-galka shirka Golaha Guud uu gacan ka geysto xoojinta taageerada caalamiga ah ee Soomaaliya, gaar ahaan dhinacyada amniga, bani’aadamnimo iyo horumarinta dhaqaalaha.
