Wararka24: Warar kala duwan ayaa kasoo baxaya khasaaraha ka dhashay weerar xalay ka dhacay magaalada Baydhaba ee xarunta gobolka Baay, kaas oo ku billowday madaafiic, kadibna isu beddelay dagaal toos ah oo u dhexeeyay ciidamada maamulka Koonfur Galbeed iyo ciidamo daacad u ah madaxweynihii hore ee maamulkaas, Cabdicasiis Xasan Maxamed (Lafta-gareen).
Sida ay sheegeen ilo deegaanka ah, weerarka ayaa saqdii dhexe laga soo qaaday dhanka waqooyi ee magaalada, waxaana lagu beegsaday saldhig ay ciidamada Gorgor iyo Booliska Militariga ku leeyihiin xaafadda Alfaras ee laanta Horseed.
Dagaalka ayaa socday ku dhowaad hal saac, iyadoo la isku adeegsaday hub culus iyo mid fudud. Wararka hordhaca ah ayaa tilmaamaya in iska horimaadku sababay dhimasho iyo dhaawac, inkastoo aan weli la shaacin tirada rasmiga ah ee khasaaraha soo gaaray dhinacyadii dagaallamay.
Sidoo kale, ilo caafimaad ayaa sheegay in dad rayid ah, oo ay ku jiraan haween iyo carruur, ay ku dhaawacmeen dagaalka, isla markaana loo qaaday isbitaalka guud ee magaalada Baydhaba si loogu dabiibo dhaawacyadooda.
Xaaladda magaalada ayaa saaka deggan, hase yeeshee weli ma jiro war rasmi ah oo kasoo baxay laamaha ammaanka Koonfur Galbeed oo ku saabsan weerarka iyo khasaaraha ka dhashay.
Ciidamada weerarka qaaday ayaa la sheegay inay muddooyinkii u dambeeyay isku abaabulayeen deegaanno ku dhow Baydhaba, halkaas oo ay marar kala duwan kasoo qaadeen weerarro iyo falal amni darro, kuwaas oo sida la sheegay ay ka hortageen ciidamada dowladda Federaalka iyo kuwa Koonfur Galbeed.
Weerarkan ayaa kusoo beegmaya xilli dhowaan magaalada Baydhaba lagu caleema saaray hoggaamiyaha cusub ee Koonfur Galbeed, Sheekh Aadan Maxamed Nuur (Aadan Madoobe), oo ku guuleystay doorashadii madaxtinnimada maamulkaasi.
