Wararka24: Dowladda Soomaaliya ayaa xoogga saaraysa sidii ay xubinnimada Bulshada Bariga Afrika (EAC) ugu beddeli lahayd fursado la taaban karo oo dhinacyada ganacsiga, maalgashiga iyo isu-socodka ah, kuwaas oo ay ka faa’iidaystaan shacabka iyo ganacsatada Soomaaliyeed.
Wasiiru-dowlaha Wasaaradda Arrimaha Dibadda Soomaaliya, Cali Cumar Balcad, ayaa sheegay in dowladda ay doonayso in bulshada Soomaaliyeed ay si wanaagsan uga faa’iidaysato fursadaha ka jira suuqa ay wadaagaan dalalka xubnaha ka ah ururka. Hadalkan ayuu ka jeediyey Shirka Saddexaad ee Bulshada Bariga Afrika (EACON 2026), oo ka furmay Muqdisho.
Balcad ayaa sheegay in shirku isu keenayo ganacsatada, siyaasiyiinta, diblomaasiyiinta, safaaradaha, jaamacadaha iyo shirkadaha waaweyn si ay uga wada hadlaan sidii loo xoojin lahaa iskaashiga dhaqaale ee Soomaaliya iyo dalalka kale ee gobolka.
Wuxuu xusay in shirarkii hore laga soo saaray talooyin u baahan in loo beddelo qorshayaal wax ku ool ah, iyadoo ganacsatada, hay’adaha dowladda iyo dhinacyada kale ay door ka qaadanayaan fulintooda. Wuxuu rajo ka muujiyey in kulanka sannadkan laga soo saaro tallaabooyin sii xoojinaya ka faa’iidaysiga xubinnimada Soomaaliya.
Soomaaliya ayaa noqotay xubinta ugu dambeysay ee ku biirta EAC, waxaana hadda horyaalla hawsha la qabsiga nidaamyada iyo hay’adaha ururka. Balcad ayaa sheegay in dowladda ay dadaal ugu jirto kordhinta matalaadda Soomaaliya iyo ka qaybgalka hay’adaha kala duwan ee Bulshada Bariga Afrika.
Wasiiru-dowluhu wuxuu sidoo kale tilmaamay in ganacsatada Soomaaliyeed ay muddo dheer xiriir ganacsi iyo maalgashi la lahaayeen dalal badan oo gobolka ku yaalla. Sida uu sheegay, xiriirkaas ayaa saldhig u noqon kara ballaarinta ganacsiga, dhiirrigelinta maalgashiga iyo xoojinta iskaashiga dhaqaale ee gobolka.
Arrimaha weli u baahan in horumar laga sameeyo waxaa ka mid ah fududeynta isu-socodka muwaadiniinta Soomaaliyeed ee dalalka xubnaha ka ah EAC. Balcad ayaa sheegay in casriyeynta baasaboorka Soomaaliya ay ka mid tahay hawlaha dowladda doonayso inay dhammaystirto, si loo fududeeyo safarka muwaadiniinta marka la buuxiyo shuruudaha dalalka ay u socdaan.
Wuxuu rajo ka muujiyey in arrinta baasaboorka horumar laga gaari doono sannadka soo socda, taas oo sahli karta isu-socodka iyo xiriirka dadka Soomaaliyeed iyo bulshada gobolka.
Xubinnimada EAC waxay Soomaaliya u abuureysaa fursado dheeraad ah oo dhinacyada ganacsiga iyo maalgashiga ah, hase yeeshee ka faa’iidaysigoodu wuxuu ku xirnaan doonaa hirgelinta heshiisyada, fududeynta habraacyada iyo awoodda ganacsatada Soomaaliyeed ay ugu tartami karaan suuqa gobolka.
