Wararka24: Xukuumadda Somaliland ayaa si rasmi ah u soo dhaweysay go’aanka Fahiima Yuusuf Cabdillaahi (Quuje), oo hore uga tirsanaan jirtay Baarlamaanka Waqooyi Bari, kadib markii ay ku dhawaaqday inay ka tanaasushay aragtidii Soomaali-weyn, isla markaana ay sheegtay inay ku biirtay qaddiyadda Somaliland.
Wasiirka Horumarinta Khayraadka Biyaha Somaliland, Maxamed Cabdimaalik, ayaa sheegay in Fahiima Quuje ay qaadatay go’aan ay si madax-bannaan u gaartay, isagoo tilmaamay inay dib ugu soo laabatay Somaliland. Wasiirku wuxuu ku sifeeyay Fahiima siyaasi miisaan leh, wuxuuna sheegay inuu ku faraxsan yahay inay dib ula midowdo dadkeeda iyo deegaannada Somaliland.
“Waxa kusoo oodantay siyaasaddii ay ku jirtay, waxayna doonaysaa siyaasad ballaadhan. Aad iyo aad ayaan ugu faraxsanahay inay Somaliland kusoo guryo noqoto, oo ay dadkeedii iyo dalkeedii la midowdo. Waxay qaaday tallaabo aad u weyn,” ayuu yiri Wasiir Maxamed Cabdimaalik.
Wasiirka ayaa sidoo kale sheegay inaan cidna lagu khasbin go’aanka ay Fahiima qaadatay, balse uu yahay mid ka dhashay wadatashi iyo go’aan ay iyadu iskeed u gaartay. Wuxuu intaas ku daray in Somaliland ay soo dhaweynayso cid kasta oo dooneysa inay ku soo biirto, isagoo xusay in xaaladda amni ee deegaannada bariga ay tahay mid deggan.
Dhanka kale, Wasiirka ayaa sheegay in Somaliland ay dhowaan soo dhaweysay siyaasiyiin iyo cuqaal ka yimid magaalada Laascaanood, kuwaas oo uu sheegay inay ku biireen dhinaca Somaliland.
Arrintan ayaa kusoo aadeysa xilli Xeer Ilaalinta Waqooyi Bari ay baarlamaanka maamulkaas ka codsatay in xasaanadda laga qaado Fahiima Quuje si baaritaan loogu sameeyo eedo la xiriira hadalladeeda siyaasadeed.
Wararkii ugu dambeeyay ayaa sheegayay inay ku sugan tahay magaalada Addis Ababa ee dalka Itoobiya, iyadoo hore u shaacisay inay u sii gudbi doonto magaalada Hargeysa.
