Guddoomiyaha Guddiga Midowga Afrika, H.E. Maxamuud Cali Yuusuf, ayaa si diirran u soo dhaweeyay go’aanka uu Madaxweynaha Faransiiska, Emmanuel Macron, ku shaaciyay inuu si rasmi ah u aqoonsanayo Dowladda Falastiin.
Hadalkan ayaa yimid kadib markii Macron ku dhawaaqay in Faransiisku diyaar u yahay inuu taageero xuquuqda shacabka Falastiin, isagoo si cad u muujiyay in dalkiisu aqoonsanayo Dowlad madax-bannaan oo Falastiini ah. Guddoomiye Maxamuud Cali Yuusuf ayaa ku tilmaamay tallaabadan mid la jaanqaadaysa mowqifkii muddada dheer ee Midowga Afrika ee ku aaddanaa taageerada shacabka Falastiin iyo xaqa ay u leeyihiin madax-bannaani iyo dowladnimo.
War-saxaafadeed uu ka soo saaray magaalada Addis Ababa, Guddoomiyaha ayaa xusay in Midowga Afrika uu marar badan ku celiyay in Falastiiniyiintu xaq u leeyihiin inay ku noolaadaan xornimo iyo amni, sida lagu xusay shirkii 38aad ee Golaha Midowga Afrika ee dhacay 15–16 Febraayo 2025.
Sidoo kale, Guddoomiyuhu wuxuu tallaabadan uga dhigay mid muhiim ah oo loo qaaday dhanka nabad waarta iyo xal waara oo laga gaaro khilaafka Israa’iil iyo Falastiin, iyadoo la tixraacayo sharciga caalamiga ah iyo qaraarada Qaramada Midoobay.
Isla waqtigaan, Golaha Baarlamaanka Britain ayaa shalay cod buuxa ugu codeeyay in dowladda UK ay si rasmi ah u aqoonsato dowladda Falastiin, taasoo markale sare u qaaday heerka taageerada caalamiga ah ee la siiyo shacabka Falastiin.
Guddoomiyaha Midowga Afrika ayaa ugu baaqay waddamada kale ee caalamka inay raacaan tusaalaha Faransiiska iyo Britain, si loo taageero rajada shacabka Falastiin ee ah inay helaan dowlad madax-bannaan oo nabad iyo cadaalad ku dhisan.
