Wararka24: Masar iyo Eritrea ayaa magaalada Asmara ku kala saxiixday heshiis cusub oo ku saabsan gaadiidka badda iyo iskaashiga dekedaha, iyadoo labada dal ay sheegeen in heshiiska uu kor u qaadi doono ganacsiga, isu socodka badeecadaha iyo amniga Badda Cas.
Munaasabadda saxiixa ayaa waxaa goobjoog ka ahaa Madaxweynaha Eritrea, Isaias Afwerki, halka wafdiga Masar ay hoggaaminayeen Wasiirka Arrimaha Dibadda, Badr Abdelatty, iyo Wasiirka Gaadiidka, Kamel al-Wazir.
Sida lagu heshiiyay, labada dhinac ayaa sameynaya marin toos ah oo maraakiibta xamuulka ah ay isaga kala gooshi doonaan dekedaha Masar iyo Eritrea. Ujeedada ayaa lagu sheegay in la fududeeyo isku socodka ganacsiga iyo in la xoojiyo xiriirka dhaqaale ee labada dal.
Masar iyo Eritrea ayaa sidoo kale carrabka ku adkeeyay in amniga iyo maamulka Badda Cas ay tahay masuuliyad ay leeyihiin waddamada xeebaha leh. Hadalkan ayaa kusoo aadaya xilli ay sii kordhayaan doodaha ku saabsan helitaanka marin badeedka gobolka.
Heshiiska ayaa yimid iyadoo ay weli taagan yihiin xiisadaha la xiriira damaca Itoobiya ee helitaanka marin badeed joogto ah iyo muranka muddada dheer ka taagan mashruuca biyaha ee Grand Ethiopian Renaissance Dam.
Masar ayaa muddooyinkii dambe xoojisay xiriirka ay la leedahay Eritrea iyo Soomaaliya, iyadoo dhinacyadu ka wada shaqeynayaan arrimo la xiriira amniga gobolka iyo iskaashiga diblomaasiyadeed.
Falanqeeyayaal ayaa u arka heshiiska Asmara inuu ka tarjumayo tartanka istaraatiijiyadeed ee sii xoogeysanaya ee ka socda Geeska Afrika, halkaas oo arrimaha Badda Cas, dekedaha, biyaha webiga Nile iyo amniga gobolka ay noqdeen qodobo si dhow isugu xiran.
Heshiiska cusub ayaa muujinaya dadaalka Masar iyo Eritrea ee lagu xoojinayo saameyntooda gobolka, xilli ay waddamada Geeska Afrika wajahayaan isbeddello siyaasadeed iyo dhaqaale oo saameyn ku leh mustaqbalka amniga iyo ganacsiga gobolka.
