Wararka24: 6-02-2026: Madaxtooyada Soomaaliya ayaa si rasmi ah u beenisay hadal kasoo yeeray Madaxweynihii hore Maxamed Cabdullaahi Farmaajo, kaas oo sheegay in Madaxweyne Xasan Sheekh Maxamuud uu ka codsaday inuu joojiyo olole taageero loogu ururinayay dhismaha guri loo sameynayay.
Afhayeenka Madaxtooyada, Cabdicasiis Golfyare, ayaa sheegay in eedeyntaasi aysan sal iyo raad toona lahayn, isla markaana uusan jirin wax wadahadal ah oo ku saabsan arrintaas oo dhex maray labada mas’uul. “Ma jiro wadahadal dhex maray Madaxweynaha Jamhuuriyadda Federaalka Soomaaliya iyo Madaxweyne hore Maxamed Cabdullaahi Farmaajo oo ku saabsan dhismaha guriga la sheegay,” ayuu yiri Afhayeen Golfyare.
Madaxtooyadu waxay intaas ku dartay in xilliga uu Farmaajo sheegay in arrintaasi dhacday, Madaxweyne Xasan Sheekh Maxamuud uu ku mashquulsanaa arrimo mudnaan leh oo ay ka mid yihiin howlgallada ka dhanka ah Al-Shabaab, dadaallada deyn cafinta iyo qaadista cunaqabataynta hubka. Villa Somalia ayaa ku eedeysay hadalka Farmaajo inuu ahaa mid lagu raadinayo hadal-hayn warbaahineed.
Murankan ayaa soo baxay kaddib markii Farmaajo uu sheegay in Madaxweyne Xasan Sheekh uu ka codsaday in la hakiyo olole taageero loogu ururinayay guri laga dhisay deegaanka Ceeljaalle ee degmada Marka.
Xafiiska Farmaajo ayaa sheegay in guriga, oo loogu magac daray “Mahadsanid Madaxweyne,” lagu dhisay lacag lagu ururiyay taageerayaal, isla markaana kharashkiisu gaaray $295,000, halka lacagta la ururiyay ay ahayd ku dhowaad $300,000.
Madaxtooyada Soomaaliya ayaa sidoo kale dhaleeceysay waqtiga la soo bandhigay gurigan, iyadoo ku tilmaantay tallaabo aan waafaqsanayn duruufaha adag ee ay wajahayaan shacabka.
Dhanka kale, Farmaajo ayaa u mahadceliyay dadkii ka qeyb-qaatay dhismaha, isagoo sheegay in ololahaasi uu muujinayo doorka ay muwaadiniintu ku leeyihiin dowladnimada.
