Wararka24: 31-01-2026:Ciidamada ammaanka Jubbaland ee ku sugan tuulada Baar Sanguuni ayaa galabtii Jimcaha gacanta ku dhigay laba dagaalyahan oo ka tirsanaa kooxda Al-Shabaab, kuwaas oo isku soo dhiibay ciidamada kadib markii ay ka goosteen kooxdodi.
Labada nin ee la qabtay ayaa lagu kala magacaabaa Axmed Mustafa Aadan iyo Ismaaciil Aadan Ibraahim, kuwaas oo hore uga tirsanaa Al-Shabaab, kuna sugnaa agagaarka jiinka Wabiga Jubba, halkaas oo ay muddo ku dhuumaaleysanayeen.
Saraakiisha ammaanka ee deegaanka ayaa xaqiijiyay in labada dagaalyahan ay wateen hub, oo mid kamid ah uu ahaa qori BKM, halka kan kalena uu watay qori AK-47 ah iyo booshkiisa, sida ay sheegeen ilo amni.
Dhanka kale, wararka ayaa tilmaamaya in maalmahan dambe ay sii kordhayaan xubnaha Al-Shabaab ee isku soo dhiibaya ciidamada Jubbaland, taas oo saraakiishu ku macneeyeen cadaadis sii kordhaya oo lagu hayo kooxda iyo hoos u dhac ku yimid awooddeeda dagaal ee gobolka.
Arrintan ayaa kusoo aadeysa iyadoo todobaadyadii lasoo dhaafay ay ciidamada Kumaandooska Danab ee Dowladda Federaalka iyo kuwa Jubbaland kordhiyeen howlgallada ka dhanka ah Al-Shabaab, gaar ahaan deegaannada ku teedsan Wabiga Jubba.
