Wararka25: 24-02-2026Iiraan ayaa mar kale ku celisay inay diyaar u tahay in xal diblomaasiyadeed laga gaaro muranka ku saabsan barnaamijkeeda nukliyeerka, balse ay si adag uga jawaabi doonto tallaabo kasta oo milatari oo uga timaada Mareykanka.
Afhayeenka Wasaaradda Arrimaha Dibadda Iiraan, Esmaeil Baghaei, ayaa sheegay in weerar kasta oo Washington ka yimaada—xitaa haddii uu noqdo mid kooban loo aqoonsan doono fal gardarro ah, isla markaana ay Tehran ku dhaqmi doonto xaqeeda is-difaac sida uu dhigayo sharciga caalamiga ah.
Hadalkan ayaa yimid kaddib markii madaxweynaha Mareykanka, Donald Trump, uu sheegay inuu ka fiirsanayo duqeyn xaddidan haddii heshiis laga gaari waayo wada-hadallada nukliyeerka.
Wadahadallo aan toos ahayn oo u dhexeeya Iiraan iyo Mareykanka ayaa la filayaa inay ka qabsoomaan magaalada Geneva dabayaaqada toddobaadkan, iyadoo Cumaan ay dhexdhexaadinayso. Labada dhinac ayaa horey u yeeshay laba wareeg oo wadahadallo ah oo ka dhacay Switzerland iyo Cumaan, kuwaas oo mas’uuliyiinta Tehran ku sifeeyeen kuwo muujiyay calaamado dhiirrigelin leh.
Si kastaba, xiisaddu weli way taagan tahay, kaddib markii Mareykanku kordhiyay joogitaankiisa milatari ee Bariga Dhexe, tallaabo ay Tehran ku tilmaantay mid aan waxtar u lahayn jawiga wada-hadallada.
Afhayeenka wasaaradda arrimaha dibadda Iiraan ayaa beeniyay warar sheegaya in heshiis ku-meel-gaar ah la gaaray, isaga oo xusay in faahfaahinta wada-hadalladu ku ekaan doonto miiska gorgortanka.
Madaxweynaha Iiraan, Masoud Pezeshkian, ayaa sheegay in dalkiisu ka go’an yahay nabadda iyo xasilloonida gobolka, balse uusan aqbali doonin cadaadis dibadeed, isaga oo carrabka ku adkeeyay in Tehran ay mar walba ilaalin doonto danaha qarankeeda.
