Iska horimaad hubeysan ayaa xalay ka dhacay magaalada Garoowe ee xarunta gobolka Nugaal, kadib markii ciidamada Booliska Puntland ay isku dhaceen maleeshiyaad la sheegay in ay wadeen hub laga soo dhacay magaalada Laascaanood.
Sida ay sheegeen ilo deegaanka ah, dabley hubeysan ayaa hubka la geeyay goob cirtoogte ah oo ku taalla bartamaha Garoowe, halkaas oo ay kula kulmeen ciidamada amniga. Arrintaas ayaa keentay israsaaseyn toos ah oo dhex martay labada dhinac.
Wararka la helayo ayaa tilmaamaya in iska horimaadka ay ku dhaawacmeen wiil iyo gabar ka mid ah dadka deegaanka oo ka agdhowaa goobta ay wax ka dhaceen. Waxaa sidoo kale la sheegay in ciidamada amniga ay gacanta ku dhigeen saddex qof oo looga shakisan yahay in ay ku lug lahaayeen dhacdada.
Illaa iyo hadda, saraakiisha laamaha amniga Puntland kama aysan hadlin faahfaahin rasmi ah oo ku saabsan dhacdada. Saaka xaaladda magaalada Garoowe ayaa lagu soo waramayaa inay deggen tahay.
Garoowe ayaa marar kala duwan la kulantay dhacdooyin amni oo u dhexeeya ciidamada iyo maleeshiyaad hubeysan, kuwaas oo mararka qaarkood sababa khasaare soo gaara shacabka iyo burbur hantiyeed.
