Wararka24: 25-01-2026 Ciidamada Xoogga Dalka Soomaaliya ayaa howlgal qorsheysan ka fuliyay tuulooyin hoostaga deegaanka Sablaale ee gobolka Shabeellaha Hoose, kaas oo lagu dilay horjooge ka tirsanaa kooxda Al-Shabaab.
War kooban oo kasoo baxay dowladda ayaa lagu sheegay in horjoogaha la dilay lagu magacaabi jiray Timaweyne, isla markaana uu kooxda Al-Shabaab u qaabilsanaa arrimo la xiriira baadda iyo caburinta dadka shacabka ah ee ku noolaa deegaannadaas.
“Horjoogaha la khaarijiyay ayaa Khawaarijta u qaabilsanaa baadda shacabka, wuxuuna muddo dheer dhibaato ku hayay dadweynaha deegaanka, ilaa ugu dambeyn ay gacanta ku dhigeen geesiyaasha Qaranka,” ayaa lagu yiri qoraalka dowladda.
Sidoo kale, bayaanka ayaa lagu xusay in ciidamada intii uu socday howlgalka ay gacanta ku dhigeen mooto nooca laba lugood leh oo loo yaqaan Feykon iyo qori nooca AK-47 ah, kuwaas oo la sheegay in uu watay horjoogaha la dilay.
Howlgalkan ayaa kusoo aadaya xilli mudooyinkii dambe ay Ciidamada Xoogga Dalka kordhiyeen howlgallada ka dhanka ah Al-Shabaab ee ka socda gobollada Shabeellaha Hoose, Shabeellaha Dhexe iyo Jubbooyinka, iyadoo dowladda ay sheegtay inay sii wadi doonto dadaallada lagu sugayo amniga iyo ciribtirka kooxda.
