Taliyihii hore ee hay’adda sirdoonka Qaranka Fahad Yaasiin Xaaji Daahir ayaa maanta hambalyo u diray Mahad Salaad oo dib loogu soo celiyay jagada agaasimaha NISA.
Fahad ayaa bartiisa X ku qoray “Taliye Mahad Salaad oo mar labaad loo magacaabay Taliyaha Nabad-sugidda iyo Sirdoonka Qaranka, waxaan leeyahay hambalyo, kusoo dhawoow mar kale NISA.”
Qoraalka ayaa muujinaya isbeddel xagga xidhiidhka labada mas’uul. Fahad ayaa muddo dheer dhaleeceyn u jeedin jiray Mahad Salaad tan iyo doorashadii 2022.
Agaasimihii hore ee NISA ayaa sidoo kale amaanay Cabdullaahi Maxamed Cali Sanbaloolshe oo xilka ka degay. “Taliye Cabdullaahi Maxamed Cali (Sanbaloolshe), waxaan ku amaanayaa xurmada iyo qaddarintii naga dhaxaysay,” ayuu qoray Fahad.
Fahad yaasiin ayaa sheegay in uu laba jeer la kulmay Sanbaloolshe muddadii uu xilka hayey. Isla qoraalkisa uu soo dhigay X(twitter)
Golaha wasiirada ayaa maanta ansixiyay magacaabistiisa cusub. Sanbaloolshe ayaa muddo toddobaadyo ah isku dayey in uu Xilkiisa ilaashado ka hor inta aan ugu danbeyn manta laga bedelin.
