Wararka24: 10-02-2026 Dowladda Eritrea ayaa si adag u beenisay eedeymo uga yimid Itoobiya oo ku saabsan in ciidankeeda ay galeen dhul ka tirsan Itoobiya isla markaana ay taageerayaan kooxo hubeysan, xilli ay sii kordhayso xiisadda labada dal.
War-saxaafadeed ka soo baxay Wasaaradda Warfaafinta Eritrea ayaa sheegashada Addis Ababa ku tilmaamay been-abuur, iyadoo ka digtay waxa ay ugu yeertay olole colaadeed oo lagu sii hurinayo khilaafka xuduudda. Asmara ayaa sheegtay inaysan dan ka lahayn muran cusub oo gobolka dib ugu celin kara dagaal dhiig ku daato.
Eedeyntan iyo beenintan ayaa timid laba maalmood kaddib markii Wasiirka Arrimaha Dibadda Itoobiya, Gedion Timothewos, uu warqad cabasho ah u diray dhiggiisa Eritrea, Osman Saleh, kuna eedeeyay ciidanka Eritrea inay ku sugan yihiin dhul Itoobiyaan ah isla markaana ay dhoolatusyo la sameeyeen kooxo fallaago ah. Itoobiya ayaa dalbatay in ciidammadaas si degdeg ah looga saaro aagga xuduudda.
Xiriirka labada dal ayaa marar badan isu beddelay dagaal, xabbad-joojin iyo is-faham kooban tan iyo dagaalkii 1998–2000. Inkastoo heshiiskii 2018 uu abuuray rajo nabadeed, haddana kalsoonida ayaa hoos u dhacday wixii ka dambeeyay heshiiskii Pretoria ee soo afjaray dagaalkii Tigray, oo Eritrea aysan qeyb ka ahayn.
Xiisadda ayaa sii kacsatay markii Ra’iisul Wasaare Abiy Ahmed uu sheegay in Itoobiya u baahan tahay marin ay u hesho Badda Cas, hadal ay Asmara u aragtay hanjabaad ku wajahan madaxbannaanideeda. Khubaro gobolka ah ayaa ka digaya in haddii labada dal ay markale isku dhacaan, ay taasi halis gelin karto xasilloonida Geeska Afrika oo horeyba uga jireen colaado kale.
