Wararka24: 28-01-2026:Wasiirka Gaashaandhigga Xukuumadda Federaalka Soomaaliya, Axmed Macallin Fiqi, ayaa faahfaahin ka bixiyay howlgal qorsheysan oo lagu dilay horjooge sare oo ka tirsanaa kooxda Al-Shabaab, kaas oo laga fuliyay gobolka Shabeellaha Hoose.
Wasiir Fiqi ayaa sheegay in horjoogaha la dilay lagu magacaabi jiray Cabdullaahi Xasan Cabdi Cosoble, oo loo yaqaanay Cabdullaahi Wadaad, isla markaana uu ahaa shaqsi muddo dheer dhibaato ku hayay amniga iyo xasilloonida shacabka Soomaaliyeed.
Howlgalka lagu khaarijiyay horjoogahan ayaa ka dhacay deegaanka Kuunya Baroow, waxaana fuliyay ciidamada Hay’adda Sirdoonka iyo Nabadsugidda Qaranka (NISA) oo kaashanaya saaxiibada caalamiga ah, sida uu sheegay wasiirku.
Wasiirka Gaashaandhigga ayaa tilmaamay in Cabdullaahi Wadaad uu tan iyo sanadkii 2017-kii kooxda Al-Shabaab u qaabilsanaa ururinta baadda, gaar ahaan gobolka Banaadir, isla markaana uu mas’uul ka ahaa falal amni darro oo badan.
“Horjoogahan wuxuu dhibaato weyn ku hayay ganacsatada, dilal badan ayuu ka dambeeyay, kuwo kalena cabsi darteed bay dalka uga qaxeen. Sidoo kale wuxuu ku lug lahaa qaraxyo lagu burburiyay goobo ganacsi oo ku yaalla Muqdisho,” ayuu yiri Wasiir Axmed Macallin Fiqi.
Wasiirka ayaa sidoo kale sheegay in labadii toddobaad ee la soo dhaafay kooxda Al-Shabaab lagu gaarsiiyay jab culus oo is daba joog ah, gaar ahaan deegaannada Ceel Dheer, Wargaadhi, Jabad Godane iyo Kudhaa, oo ka kala tirsan gobollada Galgaduud, Shabeellaha Dhexe iyo Jubbada Hoose.
Dowladda Federaalka Soomaaliya ayaa mar kale ku celisay in ay sii wadi doonto howlgallada ka dhanka ah kooxda Al-Shabaab, si loo xaqiijiyo amniga guud ee dalka loona yareeyo khatarta ay ku hayaan shacabka.
