Wararka24: 17-02-2026 Baarlamaanka Federaalka Soomaaliya ayaa maanta yeelanaya kulan wadajir ah oo ay isugu imanayaan labada Aqal, kaas oo lagu sii amba-qaadayo wax ka beddelka Dastuurka KMG ah ee muranka xooggan ka taagan yahay.
Guddoonka Baarlamaanka ayaa xalay u diray farriimo wargelin ah mudaneyaasha labada Aqal, si ay uga soo qeybgalaan kulanka maanta oo qeyb ka ah dadaallada lagu dhammeystirayo dib-u-eegista dastuurka. Ajendaha kulanka ayaa ah marxaladda labaad ee ka doodista soo jeedimaha wax ka beddelka cutubyada 7-aad iyo 8-aad, gaar ahaan qodobbada 109–119 iyo 120–129.
Kulanka ayaa ka dhacaya xarunta Villa Hargeysa, xilli Guddoonka Baarlamaanka oo ay gadaal ka riixeyso Villa Soomaaliya uu doonayo in wax ka beddelka dastuurka la dhameystiro ka hor furitaanka wada-hadallada Dowladda Federaalka iyo Golaha Mustaqbalka. Kulamadii u dambeeyay ee Baarlamaanka ayaa ku dhammaaday buuq iyo diidmo ay muujiyeen qaar ka mid ah xildhibaannada.
Xiisadda ayaa sii korortay kadib markii Guddiga Dastuurka ee labada Aqal u kala jabay labo garab, iyadoo Guddoomiye ku-xigeenka Guddiga, Senator Cabdirisaaq Cismaan, iyo xubno kale ay ka horyimaadeen habka loo wado wax ka beddelka.
Arrimahan ayaa imanaya xilli madaxweynayaasha Jubaland iyo Puntland ay Muqdisho u joogaan wada-hadallo lala yeelanayo Dowladda Federaalka, si xal looga gaaro muranka ka taagan hanaanka doorashada iyo dastuurka.
Madaxweyne Xasan Sheekh Maxamuud iyo madaxda Golaha Mustaqbalka ayaa lagu wadaa inay maanta kulan qado ah ku yeeshaan hotelka Decale ee ku yaalla gudaha garoonka Muqdisho.
Doodda ugu weyn ayaa weli ka taagan halka lagu qabanayo wada-hadallada, iyadoo Villa Soomaaliya ay ku adkeysanayso in shirka lagu qabto Madaxtooyada, halka Saciid Deni iyo Axmed Madoobe ay dalbanayaan in shirka lagu qabto gudaha xerada Xalane, arrintaas oo dib u dhigtay furitaanka wada-hadallada.
