Alle ha u naxariistee, Abwaan Aadan Tarabi Jaamac, oo ka mid ahaa hal-abuurkii ugu magaca dheeraa suugaanta Soomaaliyeed, ayaa ku geeriyooday magaalada Hargeysa, isagoo ka tagay dhaxal suugaaneed oo si weyn loogu xasuusan doono.
Marxuumka ayaa la sheegay inuu ku dhashay magaalada Caynaba ee gobolka Sool sannadkii 1948. Waxbarashadiisa Qur’aanka Kariimka ah iyo tan aasaasiga ah ayuu ku bilaabay magaalada Burco, ka hor inta uusan u jeesan hal-abuurka suugaanta, halkaas oo uu ka noqday mid ka mid ah abwaannadii ugu saameynta badnaa fanka Soomaaliyeed.
Aadan Tarabi wuxuu curiyey heeso badan oo caan noqday, kuwaas oo ay qaadeen fannaaniin caan ah. Waxaa ka mid ahaa heesihiisa Goor iyo Ayaan, Bal Dawooy, Gacan Saydh, Yufloo, iyo Dar Allaad u Hurudaa, kuwaas oo si weyn uga dhex muuqda sooyaalka fanka Soomaaliyeed. Waxa uu sidoo kale qoray riwaayado ay ugu caansan tahay Ma Ogtahay, oo ay jilayeen fannaaniin iyo jilayaal caan ahaa.
Marxuumka wuxuu ka mid ahaa abwaannadii hormuudka ka ahaa silsiladdii suugaaneed ee Deelley, taas oo lagu soo bandhigi jiray dhaliilihii loo jeedin jiray dowladdii militariga ahayd ee Soomaaliya. Sidoo kale, wuxuu door muuqda ku lahaa dadaalladii dib-u-dhiska Somaliland iyo kobcinta hiddaha iyo dhaqanka Soomaalida.
Madaxweynihii hore ee Somaliland, Muuse Biixi Cabdi, ayaa ka tacsiyeeyay geerida marxuumka, isagoo sheegay in Aadan Tarabi uu ahaa abwaan hibadiisa iyo hal-abuurkiisa ugu adeegay bulshada Soomaaliyeed, isla markaana raad muuqda ku reebay suugaanta, dhaqanka iyo fanka. Wuxuu Alle uga baryay inuu janatul firdowsa ka waraabiyo, qoyskiisa, ehelladiisa iyo guud ahaan shacabka Soomaaliyeedna samir iyo iimaan ka siiyo.
Geerida Abwaan Aadan Tarabi Jaamac Alle ha u naxariistee ayaa murugo ku noqotay bahda suugaanta iyo guud ahaan shacabka Soomaaliyeed. Waxaa lagu xasuusan doonaa kaalintii weynayd ee uu ka qaatay kobcinta fanka, suugaanta iyo ilaalinta hidde-dhaqameedka Soomaalida, isagoo ka tagay dhaxal facyaal badan sii dhex noolaan doona.
