Wararka24: Warar laga helayo gobolka Shabeellaha Dhexe ayaa sheegaya in xalay duqeyn dhinaca cirka ah laga fuliyay deegaanka Biyo Cadde, oo ay weli gacanta ku hayaan maleeshiyaadka AlShabaab.
Sida ay sheegeen ilo amni iyo warar hordhac ah, duqeynta ayaa lagu beegsaday goob la sheegay inay ku sugnaayeen xubno ka tirsan Al-Shabaab. Wararka ayaa tilmaamaya in bartilmaameedka koowaad uu ahaa guri la sheegay inuu ka socday kulan ay isugu yimaadeen xubno sare oo ka tirsan kooxda.
Ilo-wareedyada ayaa sidoo kale sheegay in duqeynta ay sababtay khasaare soo gaaray xubno ka tirsan Al-Shabaab, isla markaana ay waxyeello gaartay gaadiid dagaal oo ku sugnaa goobta. Si kastaba ha ahaatee, dowladda Soomaaliya weli ma aysan soo saarin faahfaahin rasmi ah oo ku saabsan khasaaraha ka dhashay weerarka.
Wararka ayaa intaa ku daraya in duqeyn kale lagu beegsaday kooxo la sheegay inay u gurmanayeen goobta weerarku ka dhacay. Weli lama hayo xog madax-bannaan oo xaqiijinaysa tirada khasaaraha ama faahfaahinta dadka waxyeelladu gaartay.
Xaaladda deegaanka Biyo Cadde ayaa la sheegay inay weli kacsan tahay, iyadoo dadka deegaanka ay soo sheegayaan dhaqdhaqaaqyo ciidan oo ka dambeeyay duqeymaha. Dowladda Federaalka Soomaaliya iyo saaxiibbadeeda caalamiga ah ayaa hore u sheegay inay sii wadi doonaan howlgallada ka dhanka ah Al-Shabaab ee ka socda qaybo kamid ah gobollada Hiiraan iyo Shabeellaha Dhexe.
Illaa iyo hadda, Al-Shabaab wax war ah kama aysan soo saarin duqeynta iyo sheegashooyinka la xiriira khasaaraha la sheegay in lagu gaarsiiyay kooxda. Wararka ku saabsan weerarka ayaa weli ah kuwo soo kordhaya, waxaana la filayaa in faahfaahin dheeraad ah ay soo baxdo marka ay dowladda ama ilo kale oo lagu kalsoon yahay ay war rasmi ah ka soo saaraan.
