Wararka24: Ugu yaraan siddeed qof oo rayid ah ayaa la sheegay inay ku dhinteen, halka 20 kalena ay ku dhaawacmeen duqeymo uu Mareykanku habeenkii lixaad oo xiriir ah ka fuliyay gudaha Iran, sida ay sheegeen mas’uuliyiinta Iran. Weerarradan ayaa kusoo aadaya xilli uu sii xoogeysanayo iska horimaadka militari ee u dhexeeya Washington iyo Tehran.
Mas’uuliyiinta magaalada Bandar Cabbaas ee koonfurta Iran ayaa sheegay in duqeymihii ugu dambeeyay ay waxyeello gaarsiiyeen kaabayaal rayid ah, oo ay ku jiraan xarumo koronto iyo saldhig tareen. Dowladda Iran ayaa ku eedeysay Mareykanka inuu bartilmaameedsaday adeegyo muhiim u ah shacabka.
Dhanka kale, ciidamada Iran ayaa sheegay inay weerarro ku qaadeen saldhig ciidan oo Mareykanku ku leeyahay dalka Baxrayn. Dowladda Kuweyt ayaa iyaduna sheegtay in ciidamadeedu ay ka hortageen gantaallo iyo diyaarado aan duuliye lahayn oo ay sheegtay inay kaga yimaadeen dhinaca Iran.
Dowladda Qatar ayaa xaqiijisay in hal ilmo uu ku dhaawacmay burbur ka dhashay gantaal la soo riday, kadib markii nidaamka difaaca cirka ee dalkaasi uu fashiliyay weerar lagu soo qaaday. Mas’uuliyiinta Qatar ayaa sheegay in xaaladda amniga si dhow loola socdo.
Afhayeen u hadlay ciidamada Iran ayaa sheegay in Marinka Hormuz uusan dib ugu noqon doonin xaaladdii uu ku jiray kahor dagaalka, isagoo tilmaamay in isbeddel weyn uu ku yimid amniga marin-biyoodkaas muhiimka ah.
Dhankiisa, Taliska Dhexe ee Ciidamada Mareykanka (CENTCOM) ayaa sheegay in ciidamadiisu ay fuuleen markab marayay Gacanka Cumaan si ay u dhaqan geliyaan xannibaadaha ay saareen Iran. Horumarradan ayaa muujinaya in xiisadda u dhexeysa Mareykanka iyo Iran ay sii ballaaraneyso, iyadoo saameynteedu ay gaareyso dalal kale oo ku yaalla gobolka Gacanka Carabta.
