Wararka24: Maamulka Puntland ayaa saaka degmada Jariiban ee gobolka Mudug ka fuliyay xukun qisaas ah oo lagu riday Ibraahim Kooshin, kaas oo lagu helay dilka Allaha u naxariistee Taliyihii Saldhigga Booliiska degmada Jariiban, Gaashaanle Guuleed Cabdulqaadir Kadleeye.
Xukunka ayaa la fuliyay kaddib markii uu soo maray heerarkii kala duwanaa ee garsoorka, iyadoo la sheegay in qoysaska marxuumka iyo eedeysanaha ay isku afgarteen fulinta qisaasta sida uu dhigayo sharciga.
Ibraahim Kooshin ayaa ciidamada ammaanku qabteen saacado yar kaddib dilka taliyaha. Baaritaanno iyo dacwad maxkamadeed kaddib, maxkamadaha Puntland ayaa ku xukumay dil qisaas ah, kaas oo maanta si rasmi ah looga fuliyay degmada Jariiban.
Qoyska marxuum Guuleed Kadleeye ayaa sheegay inay ku qanacsan yihiin caddaaladda lagu maareeyay kiiska, iyagoo xusay in fulinta xukunku ay ka qeyb qaadaneyso xaqiijinta caddaaladda iyo ka hortagga falalka dilalka ah. Waxay sidoo kale ugu baaqeen hay’adaha ammaanka iyo garsoorka in si degdeg ah sharciga loo horkeeno cid kasta oo lagu eedeeyo dambiyo culus.
Waxay sidoo kale u mahadceliyeen ciidamada ammaanka Puntland oo si dhaqso ah u qabtay eedeysanaha, inkastoo la sheegay inuu isku dayay inuu baxsado markii uu falka geystay.
Marxuum Gaashaanle Guuleed Cabdulqaadir Kadleeye ayaa ka mid ahaa saraakiishii tababarka ku soo qaatay dalka Turkiga, waxaana muddooyinkii u dambeeyay uu ka shaqeynayay sugidda amniga degmada Jariiban iyo la dagaallanka hubka sharci darrada ah.
Fulinta xukunkan ayaa kusoo beegmaysa xilli Puntland ay sheegtay inay sii xoojinayso tallaabooyinka lagula dagaallamayo dambiyada culus, iyadoo mas’uuliyiinta ammaanku ay ku celceliyeen in cid kasta oo ku lug yeelata falal amni-darro ah la horgeyn doono caddaaladda.
