Wararka24: Ciidamada Hay’adda Sirdoonka iyo Nabad-sugidda Qaranka (NISA) ayaa fiidnimadii maanta howlgal qorsheysan ka fuliyay xaafadda Galmudug ee degmada Garasbaaley, kaas oo lagu bartilmaameedsaday laba xubnood oo la sheegay inay ka tirsanaayeen Al-Shabaab.
Sida ay sheegeen saraakiil ka tirsan ciidamada, howlgalka ayaa lagu dilay mid ka mid ah xubnihii la beegsaday, halka xubintii kale ay dhaawac kasoo gaartay. Saraakiishu waxay sheegeen in howlgalka uu u dhacay sidii loo qorsheeyay, isla markaana ciidamada ay gaareen ujeeddooyinkii laga lahaa.
Dhanka kale, hay’adaha ammaanka ayaa sheegay in habeenkii hore ay fashiliyeen qorshe weerar oo la sheegay inay Al-Shabaab damacsanayd inay ka fuliso xaafadda Xaawo-Taako ee magaalada Beledweyne.
Sida ay sheegeen mas’uuliyiintu, ciidamada ayaa halkaas ku dilay hal xubin oo ka tirsan kooxda, halka mid kalena lagu qabtay isagoo nool.
Hay’adaha ammaanka ayaa sheegay inay sii wadaan howlgallada lagu beegsanayo Al-Shabaab, si looga hortago weerarro iyo falal amni-darro oo ay kooxdu qorsheynayso.
Howlgalladan ayaa kusoo beegmaya xilli dowladda Federaalka Soomaaliya ay dardargelinayso gulufyo amni oo ka dhan ah Al-Shabaab, iyadoo ciidamada dowladda ay howlgallo ka wadaan deegaanno kala duwan oo dalka ka tirsan. Dhanka Al-Shabaab weli kama soo bixin war rasmi ah oo ay kaga hadashay sheegashooyinka dowladda ee ku saabsan howlgaladan.
