Wararka24: Makko Maxamuud Muuse Cadde, oo loo yaqaan Makko Cafiif, ahna xaaska Taliyaha Ciidanka Booliska Soomaaliyeed, Jen. Asad Cismaan Cabdullaahi (Diyaano), ayaa magaalada Ceel Dheer ku dhawaaqday inay u taagan tahay kursi ka tirsan Golaha Shacabka ee Baarlamaanka Federaalka Soomaaliya.
Makko Cafiif ayaa sheegtay inay u tartameyso kursiga deegaan-doorashadiisu tahay Ceel Dheer, kaas oo hadda uu ku fadhiyo Xildhibaan Maxamed Cajiib. Waxay sheegtay inay u taagan tahay inay metesho bulshada deegaanka, isla markaana aysan kala sooc u sameyn doonin beelaha wada dega deegaankaas.
“Waxba idinkama qarinayo, waxaan ahay murashax xildhibaan. Deegaankan Ceel Dheer ayaan wax ku leeyahay. Beesha Wacaysle ee dhalashadaydu tahay kalama saaro; hebel waaye iyo hebel kalama aqaan,” ayay tiri Makko Cafiif intii ay ku guda jirtay munaasabad ay ka hadleysay.
Ku dhawaaqista musharraxnimadeeda ayaa kusoo aadeysa xilli wafdi uu hoggaaminayay Wasiirka Gaashaandhigga Soomaaliya, Axmed Macallin Fiqi, oo uu qeyb ka ahaa Taliyaha Booliska Soomaaliyeed, Jen. Asad Diyaano, ay booqasho ku tageen degmada Ceel Dheer. Wararka ayaa tilmaamaya in socdaalkaasi uu barbar socday kulamo iyo dhaqdhaqaaqyo siyaasadeed oo ka dhacay deegaanka.
Kursiga ay Makko Cafiif u tartameyso waxaa hadda ku fadhiya Xildhibaan Maxamed Cajiib, oo sidoo kale haya xilka Xoghayaha Arrimaha Bulshada, Shaqada iyo Shaqaalaha ee Xisbiga Caddaaladda iyo Wadajirka (JSP). Xildhibaanka ayaa sidoo kale ah guddoomiya Guddiga Xeer-hoosaadka, Anshaxa, Xasaanadda iyo Cod-bixinta ee Golaha Shacabka.
Ku dhawaaqista musharraxnimada Makko Cafiif ayaa kusoo beegmeysa iyadoo dhaq-dhaqaaqyada siyaasadeed iyo isu diyaarinta doorashooyinka soo socda ay ka socdaan qaybo kala duwan oo dalka ah. Ilaa hadda, Xildhibaan Maxamed Cajiib kama uusan hadlin musharraxnimada cusub iyo haddii uu mar kale u tartami doono kursiga uu hadda ku fadhiyo.
